Accessibility links

якшәмбе, 11 декабрь 2016, Казан вакыты 09:10

Tatarstan Konstitutsiäse tatar teleneñ latin imlasına qaytuına qarşı kilmi


Däwlät Şurasınıñ Fän, mäğärif, mädäniät häm milli mäs’älälär buyınça daimi komissiäsendä 24 dekaberdä kiñäşmä uzdı. Anda Tatarstannıñ däwlät telläre häm respublikanıñ başqa xalıqları telläre turındağı qanunnı öçençe uqılışqa äzerlek turında süz bardı. Komissiä citäkçese Räzil Wäliev äytüençä, inde ikençe uqılış uzuğa da qaramastan, älege qanunğa östämälär kertü turında küpsanlı täqdimnär kilä tora. Bu Tellär turındağı qanunnıñ berençe häm ikençe uqılış arasında waqıt bik az bulıp, barlıq täqdimnär kilep citmäw belän añlatıla. Şunlıqtan, 2004 yılnıñ 14 ğinwarında ütäçäk sessiädä öçençe uqılışta qaralaçaq qanunğa äle tağın östämälär kertelergä mömkin ikän. Däwlät Şurasınıñ Fän, mäğärif, mädäniät häm milli mäs’älälär buyınça daimi komissiäse eşçänlege turında tağın ber xäbär. İnde belgänegezçä, 24 noyäber könne älege komissiä Tatarstan Konstitutsion mäxkämäsenä respublikanıñ töp qanunınıñ 4 häm 7 matdäläreneñ berençe öleşlären añlatıp birüne sorap möräcäğät itkän ide. İsegezgä töşerep ütäbez, bu möräcäğät Tatarstan Konstitutsiäse tatar teleneñ latinğa qaytarıluın tıyamı, yuqmı ikänlegen açıqlarğa yünälgän ide. Nihayät, ber ay ütkäç, 24 dekaber könne Konstitutsion mäxkämäseneñ qararı iğlan itelde. Şuşı qarar xaqında häm komissiä äğzäläreneñ bu mäs’älägä qağılışlı kiläçäk adımnarı turında Räzil Wäliev menä närsälär äytte.

Qarar bez kötkänçe buldı. Tatarstan Konstitutsion mäxkämäse äğzäläre bik zur eş başqarıp, küp kenä xoquqı qararlarnı, xalıqara dokumentlarnı öyrängännär. Min alarğa bik räxmätle. 24 dekaber könne iğlan itelgän mäxkämä qararı nigezendä, tatar yazuın latin imlasına küçerep bula. Läkin eş monıñ belän genä betmi äle. Bez xäzer şuşı qararğa nigezlänep, Rusiä Konstitutsion mäxkämäsenä möräcäğät itärgä uylap torabız. Monda inde min uñışqa bik ışanmıy. Bu oçraqta bez xalıqara oyışmalarğa, Strasburgtağı keşe xoquqları buyınça mäxkämägä möräcäğät itäçäkbez



Şulay itep, işetkänegezçä, Tatarstan deputatları bügenge ciñü belän genä tuqtalırğa cıyınmıy. Alarnıñ bu ölkädäge eşçänlege turında bez sezgä kiläse tapşırularıbızda söylärbez.

Gölnaz İlgizär

XS
SM
MD
LG