Accessibility links

пәнҗешәмбе, 8 декабрь 2016, Казан вакыты 03:25

Ğiraq xristiannarı şatlıq qatış qurqu xisläre belän Raştua bäyrämen qarşı ala


Saddamnıñ qulğa alınuwı amerikan prezidentı George Bush öçen genä tügel, ä yözlägän meñ Ğiraq xristiannarı öçen dä üzenä kürä Raştua büläge budlı. Bügen bar katolik dönyasına quşılıp alar da Raştua bäyrämen bilgeli. Bäyräm yaña şartlarda, Saddamsız ildä ütsä dä, ildäge wazğiät älegä tınıç bäyräm itergä mömkinlek birmi

Äye, xörmätle tıñlawçılar, yalğış işetmädegez. Süz Ğiraq turında häm andağı xristiannar turında bara. İlneñ küpçelege möselman bulsa da Ğiraqta şaqtıy zur sanda xristiannar yäşi. 90-nçı yıllarğa qädär alar millionnan artıq ide. Ğiraqqa kertelgän iqtisadi sanksälärdän soñ zur öleşe yaxşı tormış ezläp Yevropa, Tönyaq Amerikağa kitte. Bügen Ğiraqta 700 meñläp xristian bar sanala. İldäge totrıqsızlıq häm bilgesezlek däwam itsä bu san tağı da kimergä mömkin. Alay da Ğiraq xristiannarı arasında Saddamnan soñ yaxşı kiläçäkkä ömet totqannarı da bar.

Misal öçen 44 yäşlek Nadal Salman. Bügen Raştua könendä ul Bagdad çirkäwenä kilgän. Çirkäwdä başqa keşe yuq, Nadal xanım yalığızı, İzge Maria ikonası qarşında tınıçlıq xaqına doğa qılıp utıra. "Wazğiät älegä bik naçar, ämmä Allahı Täğälä böyek, häm dä İzge Maria Ğiraq xalqı belän" di ul. İminlek küzlegennän çığıp tönge ğibädät irtängä küçerelgän. İntihar xöcümnärdän qurqıp, kilüçelärgä zur buqça belän kilmäskä quşılğan. Nadal xanım süzlärençä, bügen küp kenä ğailälär Raştua mäclese ütkärep tormayaçaq, çönki mäclestän soñ tönge uram buylap qaytırğa qurqa.

Çirkäw tiräsendä urnaşqan yortlarda meñlägän ğiraqlı yäşi. Beraz çittäräk divar belän uratıp alınğan Amerikan nığıtması. Andağı xärbilär Raştuağa nıqlap äzerlänä, orkestr, kürkä aşı, sport uyınnarı, cırlar belän.

Tennessee ştatınnan kilgän 23 yäşlek Chad Wilkerson Qış babay bulıp kiengän, yänäşädäge yortlar yanına barıp andağı balaçağağa xärbi maşinasınnan büläk, küçtänäç öläşä. Balalarnıñ qayberläre yätimnär, moñarçı andıy büläk kürgännäre yuq, berniçä minut eçendä qırıp-seberep alıp betergän, Xristian Radiosı cibärgän 4 tartma ber mizgeldä buşadı, di Chad. 11 yäşlek Faris Nadum qulına büläk eläkkäç başta aptırap qala, annarı Chadqa qarap yılmaya. "Minemçä alar bu yomartlıqnıñ säbäben añlamıy, läkin Raştuanıñ mäğnäsen belä, bu da yaxşı", di Chad.

Balalar xuşlaşıp kitkändä, yıraqta kük kükräwen xäterlätkän tup tawışları qaytawaz bulıp yañğırıy. Bäyräm buluğa qaramastan qaydadır xärbi operatsiä bara. Äytkändäy bu könnärdä Süriä çigendä Rawah şähäre tiräsendäge ğämällären amerikannnar Santa Claus operatsiäse dip atağan. Ğäräp telendä çığa torğan cirle Azzaman gäziteneñ soñğı sanında berençe bit tulısı belän amerikan xärbilärenä birelgän. Alar anda üzenä kürä Raştua şayartuwı urnaştırğan. Saddam qulğa alınğan könne töşerelgän sürät, ämmä anıñ saqalı aqqa buyalğan, başına qış babay başlığı kigerelgän. Texas ştatınnan kilgän serjant Gilbert Nail, iñ yaxşı Raştua büläge kemgä eläkte, digän sorawğa, beraz törtterep, mondıy cawap qaytara: älbättä Saddamğa, xäzer bit anıñ ğömer axırına qädär torır urını häm buşqa aşı bulaçaq.

Ali Gilmi, Praga
XS
SM
MD
LG