Accessibility links

шимбә, 10 декабрь 2016, Казан вакыты 08:04

Paqstan prezidentına çirattağı xöcüm yasaldı: 14 keşe xäläk bulğan, Pärwäz Möşärräf isän


Atnakiç könne Paqstan prezidentı Pärwäz Möşärräfne üterü tırışlığı yasaldı. İntihar xöcümçelär anıñ maşinası yulında bomba şartlatqan. Kimendä 15 keşe xäläk bulğan, Möşärräf üze isän qalğan. Soñğı 11 kön eçendä bu Paqstan prezidentına yasalğan ikençe xöcüm buldı

11 kön elekkese şikelle ük xöcümneñ bügengese dä başqala İslamabad yanındağı Rawalpindi şähärendä buldı. Prezident utırması, xärbi nığıtmalar urnaşqan bu şähär aşa prezident kortejı kön sayın ütä. Dikäberneñ 14-endä anıñ yulında küper şartlatılğan ide. Prezident maşinaları küperne berniçä sekund aldan çığıp ölgergän bulğan. Belgeçlär äytüençä, Möşärräfne anıñ maşinasına quyılğan maxsus cixaz qotqarğan. Çittän idarä itelgän bombalarnıñ radio-signalların tomalıy torğan andıy cixazlar här il citäkçeseneñ maşinasında bar.

Kilgän xäbärlärgä qarağanda bu yulı xöcümçelär şartlatqıç tutırılğan ike maşina qullanğan. Mäglümät ministrı Räşit Äxmät süzlärençä, başta ber, annarı ikençe maşina prezident kortejına kilep bärelgän. Nindider säbäptän, bälki şul cixaz arqasında, şartlawlar berniçä sekund soñarıp yañğırağan. Kortejdağı 3 Mersedesqa, şul isäptän prezident utırğanına beraz zıyan kilgän, ämmä Möşärräfneñ üzenä dä, anıñ yuldaşlarına da berni bulmağan. "Anı Alla saqladı" di Räşit Äxmät.

Şartlaw bulğan urın yanında politsiä bülege häm benzin stansiäse bar. Qayber xäbärlärgä qarağanda şartlawnıñ berse şul stansiädä bulğan. Xärxäldä ul şundıy köçle bulğan ki, cimereklär häm gäwdä kisäkläre ber çaqırımğa taralğan. Eçke eşlär ministrı Fäyzal Salix Xayät süzlärençä, älegä 14 keşeneñ ülüwe raslanğan, 50-gä yaqını yaralanğan. Bu keşelär – ütep baruçılar, yä benzin salırğa tuqtawçılar bulırğa mömkin. İntihar xöcümçelärneñ ikese dä ülgän dip xäbär itelä. Alarnıñ kem ikännäre älegä bilgesez. Xöcüm öçen cawaplılıqnı berkem üz östenä almadı. 11 kön elek bulğan xöcüm oyıştıruçılarnı Möşärräf ekstremist häm trerrorçılar dip atağan ide. Xäyer, anıñ doşmannar isemlege şaqtıy ozın. Anda Taliban da, Äl Qaidä dä, islamçılar da bar.

Mäglüm ki Pärwäz Möşärräf Quşma Ştatlarnıñ terrorğa qarşı suğışın xuplap çıqtı. Zamanında Paqstan belän yaxşı mönäsäbät totqan Taliban xäräkäten bärep töşerügä öleş kertte. Taliban häm Äl Qaidäneñ yözlägän äğzasın qulğa alıp, islamçılarnıñ açuwın çığardı. Sintäber ayında ğäräp televideniese aşa yasağan möräcägätendä Osama ben Laden yärdämçese Ayman Äl-Zawahri paqıstanlılarnı Pärwäz Möşärräfne bärep töşerergä çaqırğan ide.

1999 yılda qansız fetnä näticäsendä xakimiätkä kilgän general Möşärräf, berük waqıtta prezident häm ilneñ baş xärbi citäkçese bulıp tora, il belän idarä itkändä nıq qına armiägä tayana. Läkin, şul uq xärbilär arasında da, anıñ qaraşın xuplamawçılar bar. Cämğiät turında äytep torası da yuq, ul ikegä bülengän diergä bula. Ütä-islamçı partiälär Möşärräfne inde küptän xakimiäten kimetergä, xärbi ştab başlığı wazifasınnan kitergä taläp itä. İñ qızığı şul, bügen irtän Möşärräf moña rizalıın birgän ide. İslamçılar belän ireşelgän kileşü näticäsendä, ul kiläse yıl axırında xärbi wazifasın qaldırıp, fäqät prezident bulıp qalaçağın beldergän ide. Berniçä säğät ütügä aña qarşı intihar xöcüm yasaldı.

Ali Gilmi, Praga
XS
SM
MD
LG