Qıtay permyer-ministrı Wen Jiabao Pekiñ humanitar niät belän Ğiraqnıñ burıçların kimetü mäs'äläsen qarıyaçaq dide.
Wennıñ bu belderüe bügen ul AQŞnıñ maxsus wäkile James Baker belän oçraşqannan soñ räsmi Ksinhua agetnlığı aşa taratıldı.
Wen Qıtay Ğiraqnı tözekländerü eşendäge qıyınlıqlarnı häm Ğiraq xalqınıñ xälen tulısınça añlıy dide.
Ksinhua xäbärendä Ğiraq burıçlarınıñ küpme öleşe kimetelergä mömkin ikänlege äytelmi.
Qıtay äytüençä, 1990 yılda Ğiraqnıñ Qıtayğa 1 milliard 100 million dollar burıçı bulğan, ämma xäzerge burıçlar turında äytelmi.
Baker Pekiñğa kiler aldınnan Tokyoda bulıp, Ğiraqnıñ burıçları turındağı söyläşülärdä bik bik uñay tärräqiät bar dide.
Soñğı könnärdä Baker Ğiraqnıñ burıçların kimetü turındağı söyläşülärgä Rusiä, Fransiä, İtaliä, Britaniä häm Germaniäneñ quşıluına ireşte.
Ğiraqnıñ Yaponiä, AQŞ, Rusiä häm Germaniäne üz eçenä alğan Parij klubına 40 milliard dollar burıçı, Ğäräp häm başqa illärgä kimendä 80 milliard dollar burıçı bar.
