Düşämbe könne Tatarstan prezidentı Mintimer Şäymiev üzeneñ Başqortstandağı kollegası Mortaza Räximovnıñ öçençe tapqır prezident wazifalarına kereşüe belän qotlarğa kitte. Soñğı könnärgä, döresräge şimbä köngä qädär Ufadağı bu yolağa Şäymiev üze barırmı, ällä başqa berär yärdämçesen cibärerme digän soraw açıq tordı. Mintimer Şäymiev belän Räximov iñ aktual' mä’sälälärdä urtaq tel taba alırlarmı? Ällä Başqortstan prezidentı qaywaqıtta bulğança, üzeneñ plannarın, qaraşların üzgärterme? Tatarstan belän ixlas xezmättäşlekkä, respublikanıñ ber millionnan artıq tatar xalqına tigez xoquqlar birelügä ayaq çalmasmı digän sorawlar äle dä kön tärtibendä. Härxäldä, Mintimer Şäymievnıñ Tatarstan häm tatar mänfäğätlären yaqlawı tabiği. Älege mäs'älädä Tatarstan citäkçeseneñ xalıqqa tayanıp, prinsipial' räweştä üz yulınnan baruı yäki barmawı çağıla. Äytergä kiräk, moña qädär yış qına Ufa belän Qazan arasında bülgälä häm xakimlek it, «разделяй и властвуй» digän qağidä ütälgän çaqlar qabatlanıp tordı. Tatarstan prezidentınıñ mäğlümat üzäge taratqan xäbärgä qarağanda, Şäymiev üzeneñ Ufada yasağan çığışında, Rusiä şartlarında milli säyäsätneñ möhimlege häm anıñ xalıqlarnıñ mänfäğätläre isäpkä alınırğa tieşlege turında äytkän. Bez tuğan telebezne üsterü yäki älifba mä’sälälären dä üzebezneñ xoquqlarıbızdan mäxrüm itärgä tırışu belän riza bulmayaçaqbız, dip beldergän. Mortaza Räximovnıñ Başqortstanda tatar tele statusı turındağı initsiativa belän çığarğa cıyınuı turındağı belderüen, Tatarstan häm Başqortstan tatarları qänäğätlänü belän qarşı aldılar. Yäğni, Şäymiev fikerençä, bu mäs'älä, aldan äytelgänçä, xäl itelergä tieş. Şulay uq Tatarstan prezidentı “Tatarstan-Yaña ğasır“ telekompaniäseneñ tapşıruların Başqortstanda da kabel' aşa tamaşaçılarğa citkerü turında da äytkän. Mintimer Şäymievnıñ Tatarstan häm tatar xalqı fikeren Ufada şulay yañğıratuın Qazan zıyalıları xuplap qarşı aldılar. Axırı, däwamı niçek bulır.
