Accessibility links

якшәмбе, 11 декабрь 2016, Казан вакыты 13:10

Qazanda metro tözeleşe bara


Kreml'dä maqtawlı isemnär tapşırılğan waqıtta, Profsoyuznaya häm Bauman uramı kiseşkän tirädä, bulaçaq Qazan metrosınıñ Kremlevskaya stansiäsendä tantanalı miting buldı, feyerverklar kükkä atıldı. Näq şul könne Tuqay mäydanınnan Kreml'gä taba cir astınnan tonnel' qazıp barğan Söyembikä dip atalğan ğälämät zur maşina bulaçaq stansiä urınına kilep citte. Fännär Akademiäse häm Bauman uramındağı ikmäk zavodı, borınğı çirkäwdän häm arxiv idäräsennän yıraq bulmağan bu urında yözlägän keşe cıyılğan ide.

Mitingta metrotözüçelär citäkçese Marat Räximov, Qazan şähäre administratsiäse başlığı Kamil İsxakov häm Tatarstan xökümäte citäkçese Röstäm Miñnexanov çığış yasadılar. 450 yıl elek Kreml'gä cir astınnan qazıp kilep diwarnı şartlatsalar, xäzerge cir astındağı yul qazanlılarnıñ tormışın ciñeläyter, digän fikerlärne näq şuşı citäkçelär üzläre iğlan itte. Qazan metrosınıñ berençe yulı Kreml'dän Gorki mikrorayonına suzılaçaq häm bu yul Qazan şähäreneñ 1000-yıllığına, 2005 yılnıñ 30 avgustına xäräkät itä başlarğa tieş.

Düşämbe könne tağın berniçä möhim waqiğa buldı. Ozaq yıllar buyı “Mäğärif” jurnalınıñ baş möxärrire bulıp eşlägän Färit Şärifullin layıqlı yalğa, döresräge – baş möxärrir wazifalarınnan kitärgä bulğan. Anı ozatırğa häm yaña baş möxärrirne täqdim itärgä xökümät başlığı urınbasarı Zilä Wälieva, “Tatmedia” agentlığınıñ general' direktorı Marat Moratov kilde. Färit Şärifullinğa räxmät äytep, anı ozatqannan soñ, “Mäğärif” jurnalınıñ baş möxärrire itep moña qädär “Watanım Tatarstan” gazetasınıñ baş möxärrire bulıp eşlägän täcribäle jurnalist, tarix fännäre kandidatı Gäbdelxaq Şämsetdinovnı yaña wazifada täqdir ittelär. Annarı şuşı uq täqdim itüçelän törkeme “Watanım Tatarstan” gazetası redaksiäsenä töştelär. Respublikanıñ iñ zur tatar gazetasınıñ baş möxärrire itep moña qädär “Tatarstan yäşläre” gazetasında baş möxärrir urınbasarı bulıp eşlägän Miñnazıym Säfärov bilgelände. Miñnäzıym Safarov äle çağıştırmaça yäş keşe. Ul Çuwaşiäneñ batır rayonı Tatar Soğıtı awılında tuğan. “Watanım Tatarstan” häm başqa tatar basmalarındağı waqiğalarnı, üzgäreşlärne “Azatlıq” radiosı elekkeçä iğtibar belän küzätep, tıñlawçılarğa citkerep toraçaq.

Rimzil Wäli

XS
SM
MD
LG