Accessibility links

якшәмбе, 4 декабрь 2016, Казан вакыты 15:21

İrandağı cir teträw qorbannarı sanı 40 meñnän artıp kitä


Irannıñ comğa könge köçle cir teträwdän cimerelgän Bam şähärendä eşläwçe xalıqara qotqaruçılar häm räsmilär töp iğtibarnı mäyetlärne ezläwdän isän qalğannarğa yardäm itü eşlärenä yünältä. Xärabälär astında isän qalğannarnı tabu ömete kimede. 200-läp xalıqara qotqaruçı öylärenä qaytıp kitä. İranda meñyarımlap qotqaruçı qala. İran Prezidentı Möxämmät Xatami äytüençä qorbannar sanı 40 meñnän artıp kitä. Distälärçä meñ keşe açıq hawada qalğan, meñnärçä keşe meditsina yardämenä moxtac. Bügen Bamda Xatami şähärne yañadan torğızırğa wäğdä birde.

İrannı zolım küçäreneñ ber öleşe dip atağan Quşma Ştatlar İranğa yardäm töyäp oçqıçlar ozata. İranğa Amerikadan 1979-nçı yıldan soñ berençe märtäbä oçqıçlar kilä. AQŞ däwlät Departamentı wäkileneñ urınbasarı Adam Ereli berniçä könnän İranğa belgeçlär häm kiräk-yaraqlar töyägän oçqıçlar kiläçäk dide.

AUDİO: Quşma Ştatlardan berniçä oçqıç İranğa humanitar yardäm häm belgeçlär alıp kilä. Däwlät Departamentınnan, Quşma Ştatlarnıñ Xalıqara Tärräqiät İdaräsennän Bamğa 7 keşelek ğädättän tış yardäm törkeme häm 77 texnik, meditsina belgeçläre cibärelä.

Waşington Post gazetında AQŞ däwlät sekretare Colin Powellnıñ İranda baş illär belän eş itü mäs''äläsenä yaña mönäsäbät bar digän süzläre kiterelä. Powell İran xökümäteneñ Quşma Ştatlardan Bamğa cibärelgän yardämne qabul itüe ike il arasındağı mönäsäbätlärneñ yaxşıruın kürsätüçe işarälärneñ berse di. Ämma Xatami Amerikanıñ yardämen xuplasa da, bu ğına ike il arasındağı mönäsäbätlärgä tä''sir itä almıy, Amerika yağında zurraq üzgäreşlärneñ buluı kiräk dide.

XS
SM
MD
LG