Accessibility links

пәнҗешәмбе, 8 декабрь 2016, Казан вакыты 01:17

Kiläse yılda fatirlar buşlay birelmiäçäk


Sişämbe könne Tatarstanda Gorki timer yullarınıñ iñ ere stansiäse- Yudinoda 200 fatirlı yort xucalarına tapşırıldı.

Bu- “Tuzğan toraq” digän prezident programması buyınça tözelgän soñı yortlarnıñ berse. Mäğlüm ki älege programma cide yıl yäşäde häm şul däwerdä respublikada xäräbä yortlarda yäşäwçe 30 meñ ğailä buşlay fatir ala aldılar. Tatarstannıñ Rusiäneñ berdäm salım qırına kerüe säbäple kiläçäktä bu programmanı däwlät finanslıy almıy. Küptän tügel programmanı äydäp baruçısı, yäşlärçä äytkändä äydämanı- Mintimer Şäymiev monnan soñ inde buşlay toraq bulmayaçaq dip beldergän ide. Berär zavod yä fabrika da 10-15 yıl eşlägäç çirat citkäç ber tiensezgä barlıq cihazı quyılğan- “kerdä yäşä” dip birelgän fatir alırğa iälängän “prostoy” xalıq nişlärgä tieş soñ? Andıylarnı däwlät xökümät yaña yılda märxämätennän taşlamas inşalla. Äle “Tuzğan toraq” programmasınnan başqa da programmalar bar. Sişämbe könne İntertat.ru- “2003 yılda Tatarstannıñ 168 yäş ğailäse yäşäw şartların yaxşırttılar”-dip xäbär itte. Bu xökümätneñ “Yäş ğailälärgä yäşäw şartların yaxşırtuda däwlät yärdäme” qanunın ütäwgä birgän 30 million sum aqçasına tözelgän fatirlar. Älbättä bu bik az. Bülä başlasañ möğayın “Yäşlär eşläre häm sport” ministrlığınıñ yäş xezmätkärlärenä dä citmäs. Xökümätneñ tağın ber citdi programması äle urınınnan quzğalıp kitä almıy. Sotsial' ipoteka programması turında “Azatlıq” radiosında söylägänebez bar inde. “Tatarstannıñ ipoteka agentlığı” açıq aksionerlıq cämğiäte tözelgängä dä inde yartı yıldan artıq. Zur yaña problemanı quzğatıp cibärü öçen cawaplı itep härwaqıttağıça premyer ministrnıñ berençe urınbasarı Rawil' Moratov bilgelängäç bu eştä başlanıp kitte. Sişämbe räsmi xäbärlärendä- “bügen respublikada täwge märtäbä ipoteka kreditları tapşırıldı” dip uqırğa bula. Bu tarixlıy waqiğa Qazanda buldı. “Tatarstan ipoteka agentlığı”nıñ “İntexbank“ bank operatorı aşa tantanalı räweştä ike zapastağı Rusiä armiäse ofitserına birelgän. Älegä ipoteka kreditı 20 yılğa 15 protsentqa birelä. Yaña yılda kreditnı tüläw mötdäten 30 yılğa ozaytırğa, ä qaytaru protsentın küpmeder däräcädä töşerü wäğdä itelä. Bügenge köngä agentlıqqa 700 keşe möräcäğät itkän, şularnıñ 200 ipoteka kreditı birü şartları belän rizalaşqan. İpoteka kreditlaw programmasında totrıqlı kereme bulğan barlıq grajdannarda qatnaşa ala dielä räsmi xäbärlärdä. Şulay itep yaña yıl aldınnan Tatarstan Rusiädä berençelärdän bulıp sotsial' ipoteka programmasına kereşte.

Yunıs Ätnäle

XS
SM
MD
LG