Bügen İrannıñ könyaq-könçığışında, 9 kön elek bulğan köçle cir teträwennän soñ, xäräbälär astında isän qalğan olı yäştäge ike xatın-qız tabılğan. Qızıl Xac oyışması wäkile äytüençä, İran qotqaruçıları Bam şähärendä taşlar arasında 60 yäşlek ber xanımnı tapqan. Soñraq, Baqı Narenj awılında 97 yäşlek ber äbi tabılğan. Dikäberneñ 26-sında bulğan cir teträwe näticäsendä barlığı 30 meñläp keşese xäläk buldı, 17 meñe cäräxätlär aldı. Meñlägän keşeneñ äle dä yort-qurası, eçer suı yuq. Berläşkän Millätlär törkeme belderüençä, isän qalğannarnıñ ruxi xäläte bik naçar, çaralar kürelmäsä, ruxi awırular, qul salular başlanırğa mömkin.
