Accessibility links

дүшәмбе, 5 декабрь 2016, Казан вакыты 07:38

Yaña yılğa ayaq basqaç, yaña gäzitlär uqıysı kilä. Döresräge, yaratqan gäzitlärneñ yaña sannarın. Yaratmağanına da küz salırğa kiräkter. Alarnı rättän uqıp, eçtälegen söyläp ölgermäsäk tä, könlek gäzitlärneñ soñğı sannarı belän şul uq könne tanıştırırğa tırışırbız...


Yaña yılğa ayaq basqaç, yaña gäzitlär uqıysı kilä. Döresräge, yaratqan gäzitlärneñ yaña sannarın. Yaratmağanına da küz salırğa kiräkter. Alarnı rättän uqıp, eçtälegen söyläp ölgermäsäk tä, könlek gäzitlärneñ soñğı sannarı belän şul uq könne tanıştırırğa tırışırbız.

Räsmi gäzitlär – “Watanım Tatarstan” häm “Республика Татарстан” 1nçe ğinwar könne dä basılıp çıqqan ide. Ämma bu sannar dekaberneñ soñğı könnärendä äzerlängäç, alar operativ yañalıq tügel, ä yaña yıl täbrik-teläkläre belän tulı. Tatarstan prezidentı Mintimer Şäymievnıñ Yaña yıl möräcäğäte, qayber bilgele şäxeslärneñ uzğan yıl turında tä'sirläre, teläkläre basılğan alarda. Häm respublika byudjetı turında zakonğa östämälär kertü turında qanun tekstı, Akterlar yortına Marsel' Sälimcanov isemen birü turında Prezident Ukazı basılğan alarda.

Sişämbe könne, 6nçı ğinwarda çıqqan respublika häm Qazan gazetalarınıñ yaña sannarında sensatsiälär bulmasa da, bäyräm yoqısınnan uyanırğa omtılış sizelä. “Watanım Tatarstan” Mintimer Şäymievnıñ Ufadağı inauguratsiädä yasağan çığışın bastırğan. Şulay itep, nihayät, Tatarstan citäkçeseneñ Başqortstan mäğlümat çaraları töşerep qaldırğan fikerläre xalıqqa mäğlüm buldı.

Rus telendä çığuçı “Республика Татарстан” ul çığışnı basıp mäşäqätlänmägän, bu gäzit öçen ul waq-töyäk bulıp kürengänder, küräseñ. Podumaeş', Tatarstan başlığı kürşelärgä barıp, nider äytkän dä, närsäneder cirle televidenie kanalında sönnätläp, qısqartıp çığarğannar. Tem bolee, digännär küräseñ alar, waqiğa 29 dekaberdä bulğan, annan soñ ber atna ütep kitkän. Tatarlar öçen möhim närsäne rus gäzitendä yazunı kiräksenmägännärder axrı. Demokratiä bit... Döres, şul uq “Республика Татарстан” Däwlät biyu ansambleneñ 65 yıllığına bağışlap Ruziä Safiullina yazğan mäqäläne bastırıp çığarğan. Xätta milli kiemle biyuçelärneñ räseme dä quyılğan şunda.

“Watanım...”nıñ sişämbe sanında “Xoquq häm xäyät” jurnalınıñ 90 yıllığın ütkärü turında yazma bar. Küptän tügel terkälgän şul isemdäge jurnal 1913nçe yılda tuğan ikän. Qarasañ, bu tatar dönyasındağı iñ elek çıqqan jurnallarnıñ berse, ä yuridik basmalarnıñ iñ berençese.

Şul uq gäzittä Fänzaman Battalnıñ bügenge kön, satira, xalıq yazmışı turında “Tuqtatığız bu cir şarın” isemle mäqäläse çıqqan. Yagsuf Şäfıykov Aqtanış rayonı, Puçı, Änäk awılları, şul yaqnıñ keşeläre turında mäqälä yazğan.

Şulay uq cinayätçe militsionerlar xaqında, Täteş rayonındağı işelgän qoyılı, qarañğı uramlı awıl turında mäqälälär bar bu gäzittä.

“Tatarstan yäşläre”neñ 6nçı ğinwar sanında maymıl yılı yoldıznämäsenä ber bit urın birelgän, “Serdäş” bitendä pähläwän kebek ire östennän yörüçe xatın yazması, zinaçı xatınğa mönäsäbät beldergän fikerlär basılğan. İskändär Siracinıñ ataqlı artistqa İslamiä Mäxmütova turında zur mädxiä-mäqäläsen dä “Tatarstan yäşläre” çığarğan. Ğomumän, gäzit qızıq, bigräk tä ölkän buın öçen mawıqtırğıç. Xäzerge ölkännär yäşlärçäräk citez bit ul.

Gabdelfät Safinnıñ “Aqçarlaq” gäzite üzeneñ atnalıq basma ikänlegen raslap, 6 ğinwarda uq çıqqan. Sänğät'ne yaratuçılar öçen çığuçı bu gäzittä drama artistı Nail Ayupovqa iğtibar mul birelgän. Nail äfändeneñ dä prezident yaqtaşı, xätta sabaqtaşı ikänlegen istä totsañ, bügenge gäzitlärneñ Aqtanış keşelärenä iğtibarın sizep bula. Ğädättä gel genä alay bulmıy ul.

Matbuğatta säyäsät xäzergä bik kürenmi. Şulay da Mäskäwdä çığuçı “Совершенно секретно” gäziteneñ berençe sanın iskä almıy yaramas. İosif Gal'perinnıñ ike bitlek zur mäqäläsendä Başqortstanda ütkän saylaw turında arqadan tir çığarlıq itep yazılğan. Sergey Veremeenko, Ralif Safin, Alsu portretları belän berrättän Mortaza Räximov häm anıñ ulı Ural räsemnäre quyılğan. Mäqäläneñ eçtälegen anıñ iseme yaxşı açıqlıy “Любимый хан Кремля” (“Kreml'neñ yaratqan xanı”) menä şulay dip atağannar “Совершенно секретно” gazetasındağı zur yazmanı. Mortaza Räximov saylanıp, bäyräm itkäç tä, aña tozlı-borıçlı sälämnär kilä başlağan. Äle bit yıl başlana ğına.

Rimzil Wäli
XS
SM
MD
LG