Çärşämbe könne, 7 ğinwarda, Qazanda räsmi gäzitlär häm tatarça basmalar çıqmadı. Şunlıqtan başta sişämbe küzätüenä eläkmägän ike gäzitkä küz salıyq. Şähri Qazannıñ bıyılğı berençe sanında yaña yıl qarşılağanda äytelä torğan täbriklär, baş möxärrir süze, kanikulğa çıqqan uquçılar tormışı, maymıl obrazı çağılğan yazmalar basılğan. İkençe bit tulısınça elemtäçelärgä bağışlana – Qazan şähär elemtä stansiäsenä 115 yıl tulıp kitkän. Dürtençe bittä çigü ostası Fatıyma Ğabdullina turında mäqälädän ğäyre akademik Äxmät Mazharovnıñ Malayziägä säfäre turında Xämzä Bädertdinov mäqäläse bar. Xalıq ara däräcädä tanılğan çın akademik Äxmät Mazharov neft' eşkärtü texnologiäsen çığaru mäşäqätläre belän çit illärdä zur keşelär belän aralaşıp qaytqan, ul İslam fännär akademiäsenä saylanıp, anıñ konferensiälärendä qatnaşa.
Mäğrifät gazetasınıñ da berençe sanı qızıqlı.Mintimer Şäymiev, Rusiä,Tatarstan mäğärif ministrları qotlawları, Läbibä İxsanova xatiräläre, mäğärif ministrlığınıñ ğinwar ayına eş planı,Qama Tamağı rayonınıñ İske Barış awılı mäktäbeneñ Erudit tügäräge turında Näsim Aqmal yazması,dramaturglar atası Ğäliäskär Qamalnıñ 125 yıllığına, ädäbiät ğalimä Möxämmät Ğäynullinnıñ tuuına 100 yıl tulu, şuşı ataqlı professor tuıp üskän Qızıl Taw awılında häykäl açılu, isemen şul awıl mäktäbenä birü turındağı mäqälälär qızıqsınu uyata.
Mäğrifät eşläre millätkä faydalı bulsa, säyäsät yulında yörüçelärneñ matbuğatı üz eşen qayğırta. Oppozitsiädäge rusça gäzitläneñ berençe sannarı uq bıyılğı qışnıñ qızu bulaçağın sizderä. İke Veçerka- iskese dä, yañası da, Çallı tipografiäsendä basıla torğan İzvestiä Tatarstana gäzite küptän tügel ütkän duma saylawları ruxı belän yäşi, mart ayında bulaçaq Tatarstan däüsovetına deputatlar saylawğa da küz tota. İske “Veçerka” yomşağraq suqtırsa, yañası turıdan turı bärä. Berençe sannan Respublika elitasın ikegä bülä-respubliqa başlığı belän Qazan şähäre başlığın ber bersenä qarşı quyıp, bäreşterep qarıy. Anda xäzer uq oçqınnar çığıp tora, kürşe Başqortstandağı kebek mäğlümat suğışı başlanaçağı küzgä taşlana. Älbättä, mondıy mäğlümat granataları mänfäğättän çığıp ırğıtıla, beräwlär ikençelären xakimiättän bärep töşerergä omtıla. Mondıy aksiälär öçen zur aqçalar tülänä. “Azatlıq” radiosı başqalar aqça eşläp, qotqı taratqanda, alarğa yärdämçe itep yallanmağan. Şunlıqtan, kiläçäktä gäzit isemnären iskä almawğa, sensatsiälärne qabatlamawğa üpkälämässez. Şulay da tıñlawçılarıbız cilneñ qaya iskänen, sunıñ qayan aqqanın bezneñ tapşırulardan belep torır.Rimzil Wäli, Qazan.
