Accessibility links

Кайнар хәбәр

Mäskäwdä tatarça çırşı bäyräme


Mäskäwdä uquçılarnıñ qışqı kanikulları könendä Asadullayev yortındağı tatar milli mädäni üzägendä soñğı berniçä distä yılda berençe tapqır tatar balaları öçen çırşı bäyräme uzdı. Bu yortnıñ xalıqqa qaytarılğanına inde berniçä ay uzsa da, şähär bäyräme bularaq mondıy zur bäyräm bu binada berençe märtäbä ütkärelde.. Binanıñ iñ zur, säxnäle zalınıñ urtasına matur itep bizälgän 3 metr bieklegendäge çırşı urnaştırılğan ide. Oyıştıruçılarnıñ äytüenä qarağanda biredä 115 bala häm şul uq xätle dip äyterlek ata-ana da qatnaşqan. Çınlap ta ul könne milli üzäkkä kilgän xalıq mäş kilep üzençä, tatarça bäyräm itte. Qış babay da balalar belän çırşı tiräli äylängännän soñ, säxnägä menep, çığış yasаmawçı balalar yanında urının aldı häm härbersenä dä zur qapçığınnan büläklären öläşte. Bu Mäskäwdäge berençe tatarça çırşı bäyrämen oyıştırunı üz östenä Tatarstannıñ atqazanğan cırçısı Roza Xabibullina alğan ide. Ul anı alıp ta bardı häm ul citäklägän «Ayqay» törkeme dä bäyrämdä tatar xalıq äkiätläre personajları kiemennän buldılar. Biredä Şüräle dä Ubırlı qarçıq ta , Qar qızı da bar ide.

Roza Xabibullina belän bulğan äñgämädä ul bäyrämne oyıştıru, xalıqqa niçek belgertüe turında söyläde. häm küp kenä tatar oyışmalarınıñ şul isäptän, “Fayda” fondınıñ häm tatar zıyalıları Klubınıñ bäyräm ütkärüdä matdi yärdäm belän qatnaşuların äytep, alarğa räxmät belderde. Qayber ğailälär dä bu bäyrämgä bitaraf qalmağan. Xaris İlyasov, Räximä Räxmätullina, Raşit Nevretdinovlar da matdi yärdäm kürsätkännär.

Balalarnıñ küpçelege tatarça cırlar cırladı, şiğerlär söyläde. Mäsälän Yäsmin Batalovanı tatar uqıtuçısı öylärenä yörep uqıta ikän. Ä menä Rafiä Sadıykovağa barı tik 4 kenä yäş bulsa da ul bik küp şiğerlär yatlağan. Rafiägä şiğerlärne apası Rumiä öyrätkän. Rumiä tatarça ğına tügel, gäräp telen dä belä, Köränne dä uqi, cırlawı da matur , şuña kürä ul «Ayqay» törkemendä dä başlap cırlawçı.

Roza Xabibullina ğına tügel, başqa millättäşlär dä bu çırşı bäyräme xalıqnıñ bu yortnı üzeneke itep tanuda, balalar belän bäyrämnärdä qatnaşuda berençe adım buldı dip sanıylar.

Yazmanı «Azatlıq» Radiosı öçen Näzifä Kärimova äzerläde.
XS
SM
MD
LG