Accessibility links

якшәмбе, 4 декабрь 2016, Казан вакыты 17:28

Azatlıq radiosı büläge – Zölfiä Kamalovağa


Comğa könne nihayät küplär kötep alğan «Tatar cırı-2003» festivale açıldı. Bıyıl älege televizion festival’ inde 4nçe märtäbä ütkärelä. 9nçı ğinwardan alıp, 3 kön däwamında Piramida küñel açu üzägendä tatar cırı xökem söräçäk. İnde äytkänebezçä, Tatar cırı bäygese bıyıl başqa yıllarğa qarağanda üzençäleräk bulaçaq. Comğa könne ütkän konsertta Tatar cırı festival’neñ lawreatları isemenä layıq dip bilgelängän 17 tatar estradası yoldızı Piramidağa cıyılğan tamaşaçılarğa üzläreneñ yaña cırların täqdim ittelär. Şimbä kiçendä isä lawreatlarğa Altın bars premiäsen tapşıru tantanası uzaçaq. 11nçe ğinwarda isä, «Tatar cırı-2003» festivaleneñ yabılu tamaşası ütäçäk. Bıyılğı festival’neñ tağın ber üzençälege – anda Tatarstan cırçıları ğına tügel, ä çittäge tatar cırçıları da qatnaşaçaq. Festival’neñ qunaqları arasında Avstraliädän Zölfiä Kamalova, Finländiädän İsmal, Mäskäwdän Rinat İbrahimov, Ufadan İdris Ğäziev bar. Şunısın da äytep kitik. «Tatar cırı-2003» bäygesendä «Azatlıq» radiosınıñ büläge dä tapşırılaçaq. Bıyıl älege büläkkä layıq dip dönyanıñ törle töbäklärendä tatar cırın tanıtıp yörüçe Zölfiä Kamalova tanıldı. Azatlıq radiosınıñ büläge cırçığa 10 ğinwar kiçendä ütäçäk tamaşada tapşırılaçaq.

Ğäliäskär Kamal teatrı artistları isä bu könnärdä yaña spektakl’gä soñğı äzerleklär belän mäşğül. Tizdän alar tamaşaçılarğa Ayaz Ğiläcev äsäre buyınça «Yara» dip isemlängän spektakl’ täqdim itäçäk. Anı rejisser Färit Bikçäntäev säxnäläştergän. Ä menä Qazan tatar yäş tamaşaçılar teatrı quyarğa cıyınğan spektakl’ äle yazıla da başlamağan. Teatrnıñ baş rejisserı Rinat Äyupov anı icat itüdä barlıq teläwçe yäşlärgä qatnaşırğa täqdim itä, dip xäbär itä İntertat.ru säxifäse. Yäşlärgä qızıqlı spektakl’ icat itü öçen, bez yeget-qızlarğa möräcäğät itep, alarğa üzlären borçığan problemalar, alarnı çişü yulları turında tarixlar cibärergä täqdim itäbez. Alar nigezendä yaña pyesa yazılıp, bezneñ säxnädä quyılaçaq, di Rinat Äyupov.

Mädäniät xäbärläreneñ axırında – ber qayğılı xäbär. 8nçe ğinwar könne Tatarstanda kürenekle yazuçı Qoyaş Timbikova belän xuşlaştılar. Yazuçını anıñ tuğan cirendä – Çistay rayonınıñ Naratlı yılğa awılında cirlädelär.

Gölnaz İlgizär

XS
SM
MD
LG