Accessibility links

шимбә, 3 декабрь 2016, Казан вакыты 07:54

Raxman awılında qışqı kanikullar faydalı ütä


Sverdlov ölkäse möselmannarınıñ Qazıylat idäräse yäş buınnı din-äxlaq ruxında tärbiäläw eşen däwam itä. Bu könnärdä Krasnoufim rayonınıñ Raxman awılında mäktäp balaları öçen oyıştırılğan ruxi seminar bara. Qışqı kanikul könnären qızıqlı häm faydalı itep awıl mäktäbendä Raxman, Bäyäk Tüz häm Biş awıldan barısı 48 bala ütkärä.

Alarnı qızıqsındıru öçen çaralarnıñ barısı da kürelgän: biredä dini däreslär belän bergä tuğan yaq tarixın öyränü, tatar tele, fizkul'tura däresläre dä qızıqlı itep, uyın räweşendä oyıştırılğan. Öylägä qädär alıp barılğan dini däreslärne qız balalar öçen Qazannıñ Möxämmädiä mädräsäsennän kilgän ike qız – möğallimälär, ir balalar öçen Yekaterinburgtan kilgän Ruslan xäzrät alıp bara. Biredä balalarnı islam dine tarixı, anıñ nigezläre belän tanıştıralar, ğäräp tele buyınça başlanğıç belem birälär, doğalarğa, namaz uqu tärtibenä, qor’än sürälären döres itep uqırğa öyrätälär. Öylädän soñ ğädättä sport uyınnarı, törle yarışlar oyıştırıla, tuğan tel häm tarix däresläre alıp barıla. Könenä öç märtäbä tuqlanu da oyıştırılğan.

Yaña yılnıñ iñ berençe könnärennän ük açılğan seminarğa bu köngä qädär balalar bik teläp häm qızıqsınıp yörilär. Qazıylat idäräse citäkçese Danis xäzrät Däwlätov äytüençä, mondıy seminarlar Sverdlov ölkäsendä berençe tapqır ğına oyıştırılmıy.

Möselman balalarına ruxi tärbiä birü mömkinçelege monnan dürt yıl çaması elek Sverdlov ölkäse mäğärif ministrlığı belän Qazıylat idäräse arasındağı kileşügä qul quyğannan soñ barlıqqa kilde. Mondıy çaralarnıñ tärbiäwi faydası bäxässez.

Daimi räweştä mondıy seminarlar oyıştıru, bilgele inde, ciñel tügel. Bu bik küp ruxi häm matdi çığımnar taläp itä torğan eş. Bu eştä Qazıylat idäräseneñ teläktäşläre, yärdämçeläre, şöker, küp. Bu eştä möğallimnär belän daimi räweştä tä'min itep toruları öçen Qazıylat idäräse citäkçeläre Tatarstan diniä näzarätenä, Möxämmädiä mädräsäse citäkçelärenä bik räxmätle. Seminarlarnıñ matdi yağın Milli Media-Xoldingqa nigez saluçılardan Rinat Askarov häm Al'bert Afzalov tä'min itkän.

Sverdlov ölkäse möselmannarınıñ Qazıylat idäräse yäş buınnı din-äxlaq yulında tärbiäläw buyınça üz östenä alğan burıçnı änä şulay namus belän başqara. Mondıy küçmä seminarlardan tış, Yekaterinburg şähäreneñ Raxman mäçetendä, Pervoural'ski şähäre mäçetendä daimi räweştä dini yäkşämbe mäktäpläre eşläp kilä. Alarğa olısı-keçese bik teläp yöri.

Şundıy maqtawlı eşlärne alıp baruçı Qazıylat idäräse citäkçelärenä xalıq bik räxmätle.

Fäwiä Safiullina.Yekaterinburg.

XS
SM
MD
LG