Accessibility links

Кайнар хәбәр

Daniä ğaskärläre Ğiraqta yäşerelgän raketalar taptı


Ğiraqtağı Daniä xärbi köçläre comğa könne Ğiraqnıñ könyağında 36 raketa yadräse häm ximik qoral qaldıqları tabılğanın xäbär itte. Şunda uq uzdırılğan berençe tikşerü näticäläre yadrälärdä – ağulı gaz bulğanın kürsätte. Daniä räsmiläre belderüençä, älege raketalar kimendä 10 yıl elek kümelgän bulğan. Daniä Ğaskärläre İdaräseneñ belderüendä, 120 millimetrlı bu raketalarda çınnan da ağulı gaz bulu-bulmawın äle centekläp tikşerergä kiräk, dielä. Quşma Ştatlar citäkçelegendäge xärbi çara näticäsendä xakimiättän bärep töşerelgänçe Säddäm Hösäin, böten tıyılğan ağulı qorallarnı yuq itüe turında beldergän ide. Daniä ğaskärläre belän bergä tikşerülär uzdırğan İslanidä belgeçläre, qoral zapasları İran çigennän yıraq tügel uzğan olı yul tözeleşe waqıtında, Amara şähärennän ber 75 çaqrım yıraqlıqta kümelgän bulğan, dip belderde. Bağdadta Amerikan generalı Mark Kimmit, jurnalistlarğa, älege qoral Ğiraq xärbi köçläreneñ 80nçe yıllarda İran ğaskärlärenä häm Ğiraqlılarğa qarşı qullanılğan çordan qalğan, dip xäbär itte: "Bezgä Britaniäneñ Atom, Biologik, Ximik köçläre quşıldı. Bu urınnı bez uratıp aldıq, xäzer anda tınıç. Älege qoral 80nçe yıllar başındağı İran-Ğiraq suğışınnan qalğan dip farazlana" dide amerikan xärbi köçläre wäkile.

Könyaq Ğiraqtağı britan xärbi köçlärneñ matbuğat wäkile Tim Smith – tikşerülärne Quşma Ştatlar citäkçelegendäge Ğiraq Tikşerü Törkeme başqara, dip xäbär itte. Törkemgä meñ 400ä yaqın amerikan, britan häm australiä belgeçläre kergän: "Basranıñ tönyağına taba Daniä ğaskärläre raketa yadräläre häm başqa törle qoral taptı. Alarnıñ tögäl sanın äle açıqlıylar. Bu eş xäzer Ğiraq Tikşerü Törkeme qaramağında. – Tikşerülärdän soñ tulıraq mäğlümatne alar biräçäk. Şulay itep, älegä, bu eş Ğiraq Tikşerü Törkeme kontrolendä diüdän başqa min ber ni dä äytä almıym" dide Britan ğaskärläre wäkile.

Tabılğan raketalar plastikka törelgän bulğan, ämma alardağı sıyıqça ağa başlap qoralnı tabuğa yardäm itkän.

Daniä ğaskärläre xäbär itüençä, 3 raketağa yasalğan 4 törle tikşerü – yadrälärdä ağulı gaz buluın isbatlağan. Bu gaznıñ ber töre – keşelärdä tännärendä sulı qabarçıqlar yasıy, üpkägä eläksä – keşeneñ ülemenä kiterä. Ağulı gaznıñ ber töre – gorçitsa gazı – distä yıllar buyına cirdä toksinnar – ağulı maddälär çığarıp tora ala.
XS
SM
MD
LG