İrannıñ yuğarı ruxi citäkçese Ayatulla Ali Xamenei ildäge säyäsi krizisqa älegä qatnaşmayaçağın belderde

İrannıñ yuğarı ruxi citäkçese Ayatulla Ali Xamenei yözlärçä namzätneñ parlament saylawlarınnan çitläşterelüe säbäple başlanğan säyäsi krizisqa älegä qatnaşmayaçağın belderde. Xamenei bu problema xoquqıy yullar belän çişelergä tieş, barlıq xoquqıy adımnarnı ütkännän soñ faydası bulmasa şul çaqta ğına bu eşkä qatnaşaçaqmın dide. İrannıñ İnqilab Saqçıları Şurası tarafınnan quyılğan çikläwlärgä protest yözennän bügen 90-lap reformaçıl deputat urınnarınnan quzğalmıy utıra. Älege çikläwlär yözlärçä reformaçıl namzätkä, şul isäptän xäzer parlamentta bulğan 80-läp deputatqa saylawlarda qatnaşu mömkinlege birmiäçäk. Prezident Möxämmät Xatami bu qarar dini demokratiä qağidälärenä yaraşlı tügel dip Xamenei belän bu turıda söyläşergä wäğdä birde. Yewropa Berlege İrannıñ demokratik saylawlar standarların bozmawı Berlek belän mönäsäbätlär öçen zarur şartlarnıñ berse dip belderde. Berlekneñ tışqı säyäsät öçen cawaplı ölkän wäkile Javier Solana Tähranda çığış yasap, xäzerge deputatlarnıñ nigä saylawlardan çitläşeterelüen yewropalılarğa añlatu qıyın bulaçaq dide:

AUDİO: Bez saylaw protsessınıñ mömkin qädär ğädel häm açıq buluın bik nıq telibez. Saylaw momentı ğına tügel, ul saylawlar aldındağı protseslar da şundıy bulırğa tieş. Bez menä şunı kürergä telibez. Häm hiçşiksez, bu ildäge xalıqnıñ küpçelege dä şunı teli.