Accessibility links

чәршәмбе, 7 декабрь 2016, Казан вакыты 11:41

“Tatar cırı-2003” festivale tämamlandı


Yäkşämbe kiçendä “Tatar cırı-2003” televizion festivale tämamlandı. Piramida tamaşalar üzägendä bu yulı 500dän artıq qunaq cıyıldı. Comğa, şimbä konsertlarında Piramidada meñnän artıq tamaşaçı urındıqlarda utırıp qarasa, yäkşämbe gala-konsertı tamaşaçıları sıy-xörmät quyğan öställär artında sıylanıp, tamaşa qaradı. 3 kön däwam itkän bu konsertlarda nigezdä ber ük cırçılar qatnaştı. Räsmi yaqtan iñ cawaplı häm bay tamaşa şimbä kiçendä buldı. Bu könne 18 cırçığa Altın bars büläkläre tapşırıldı. Tatarstan prezidentı Mintimer Şäymiev tä şuşı kiçtä Piramidağa kilep, konsertnıñ axırğı minutına qädär tamaşa qıldı. Tatar cırı telefestivale törle bäxäslär, mädxiälär, tänqit süzläre uyattı. Bu yulı ul xalıqara festival' däräcäsendä ütkärelde. Şimbä könne uzğan tamaşada İdris Ğäziev, Rezidä Şäräfieva, El'za Äxmätcanova belän bergä konsertnı alıp baruçı Salawatnıñ da benefisı buldı. Çönki, näq şul uq 10 ğinwarda anıñ tuğan köne ide.

Tağın ber üzençälek. Piramida zalınıñ säxnäsendä Avstraliädä yäşäwçe millättäşebez Zölfiä Kamalova çığış yasağaç, zal görlätep qul çaptı. Aldan iğlan itelmägän bulsa da, Zölfiä Kamalovağa Altın bars prizı häm Azatlıq radiosınıñ maxsus büläge tapşırıldı. Bu xaqta täfsilleräk itep, ayırım ber tapşıruda söylärbez. Çınnan da, Zölfiä Kamalova üzeneñ sağış-moñnarı belän başqalarda ayırılıp tordı. Ul festival'neñ iñ zur açışı buldı. İdris Ğäziev, Salawat, Xäniä, Zäynäp häm başqa cırçılarnıñ çığışlarına iğtibar bigräk tä zur buldı. Şağirlär, kompozitorlar da çittä qalmadı. Konsertlarğa bilet bäyäse 1500 sum çaması, ä soñğı, tabınlı mäcleskä 3000 sum bulsa da, biletlar aldan uq satılıp betkän ide. Şunısı qızıq, yäkşämbe kiçendäge soñğı çığış Tatarstan-Yaña ğasır telekanalı aşa turıdan-turı tapşırıldı. Şulay itep, 2500 keşe Piramidağa kerer öçen yartı aylıq eş xaqın tüläsä, millionlağan televizor qarawçılar konsertlarnı üz öyendä kileş räxätlänep qarap utırdı. Piramidağa baruçılar da, öydä qarawçılarda qänäğät qaldı.

Xäzer bez sezgä Tatar cırı-2003 festivalen kürer öçen maxsus Amerikanıñ Kaliforniä ştatınnan kilgän Rqıya xanım Safanıñ tä'sirlären işetteräbez.

Miña älege festival’ bik oşadı. Bıyılğı konsertlar başqa yıllardağı belän çağıştırğanda da äybäträk buldı. Cırlar da bik matur, süzläre dä mäğnäle, yäş talantlar da şaqtıy. Min şuşı tamaşalarnı qarap, tatar estradası öçen ğorurlanıp utırdım – nindi genä cırçı, nindi genä cır yuq anda. Zölfiä Kamalovağa Azatlıq radiosınıñ bülägen tapşırunı da bik xuplıym. Zölfiä tatar cırınıñ kiñ mömkinleklären kürsätüçe cırçı ul

Roqıya xanım häm başqa qunaqlar Piramidada bulğannan soñ, näq şuşı könnärdä dönya kürgän Mäñgelek moñ digän lazer tälinkäsen üzläre belän alıp kittelär. Bars media kompaniäse çığarğan bu tälinkädä tatar xalqınıñ iñ mäşhür cırçıları başqaruında iñ matur borınğı cırlar yazılğan. Lazer tälinkäsenä Mäñgelek moñ digän beleşmä kitapçıq ta quyılğan. Şulay itep tamaşa käsebe, şou-biznes xäzer tatar moñnarın saqlaw, taratu eşenä dä üz öleşen kertä.

Rimzil Wäli

XS
SM
MD
LG