Aldan iğlan itelgänçä, «Berdäm Rusiä»neñ Tatarstan bülege dä, Rusiä Prezidentı saylawlarında Vladimir Putinğa teläktäşlek kürsätüe turında beldergän. Annan soñ, firqä Tatarstan saylawlarına äzerlek mäs’äläsen dä qarağan.
«Berdäm Rusiä»neñ Tatarstan bülege barlığı 91 firqä wäkilen Däwlät Şurasında kürergä teli. Alarnıñ 49 – firqä isemlege belän bara. Firqäneñ yözen bilgeläwçe berençe 3-lekkä tanılğan, däräcäle keşelär kergän: säyäsätçe Färit Möxämmätşin, hönär berlekläre federatsiäse räise Tatyana Vodopyanova, Universitet rektorı Mäqzüm Säläxov.Şulay uq, firqä isemlegenä xäzerge deputatlardan Tufan Miñnullin häm Marat Ğäliev kergän. Anda «Tatarstan yaña ğasır» televideniese citäkçese İlşat Äminov, firqäneñ yäşlär bülegennän Dmitriy Ftorov häm Marat Buxarayıvnıñ isemnären kürep bula.
1 mandatlı okruglarğa xakimiät firqäse 42 nämzätne kürsätä. Alar arasında parlament citäkçese Färit Möxämmätşin, KamAZ şirkäte citäkçese Sergey Kogogin häm başqa citäkçelär dä bar. Töp säyäsi yañalıq, nämzätlärneñ kem buluında tügel, ä niçä buluında ide.Xakimiät firqäse citäkçese Färit Möxämmätşin saylaw aldı kompaniäse başında uq, parlamenttağı barlıq urınnarnı alırğa cıyınmawı häm eşlekle oppozitsiä belän kileşep eşläw mömkinlege turında beldergän ide. İnde xäzer, isemlek kürsätkänçä, xakimiät firqäse 8 urınnı başqa säyäsi köçlärgä birergä äzer, dip äytep bula. Häm tağın 1 urın – firqä isemlege belän ütkän keşegä tätergä mömkin.
Berdäm Rusiä kürsätkän 42 nämzätneñ barısı da 1 mandatlı okruglarda ütärme yuqmı, aldan äytüe qıyın. Läkin Tatarstan Prezidentınıñ yuğarı reytingı häm administrativ resurs, nämzätlärneñ saylanu şansların zurayta. Ä menä qalğan 8 okrugta oppozitsiä arasında qatı köräş bulır, dip farazlarğa mömkin.
Prezident Mintimer Şäymiev, «Uñ köçlär» wäkillären parlamentta kürergä teläüläre turında äytkän ide. Ämma, qayber mäğlümatlarğa qarağanda, uñ häm demokratik köçlärneñ Tatarstan büleklärendä älegä berdämlek yuq, eçke qarşılıqlar östenlek itä. Kommunistlar, oppozitsiädäge oyışmalardan torğan «Tügäräk östäl» belän kileşterep eşlärgä uylıy, häm şul uq waqıtta partiä isemlege belän dä saylawlarda qatnaşırbız dip plannar qora. Kommunistlardan barlığı 27 keşe nämzätlär isemlegenä kergän.«Tormış firqäse»neñ Räfqät Altınbayıv citäkçelegendäge Tatarstan bülege dä saylawlarğa nıqlap torıp äzerlänä. Bu säyäsi oyışmadan barlığı 22 keşene nämzät itep kürsätelgän.
Şulay uq, xäzerge Tatarstan deputatlarınıñ kübese häm Dumağa ütä almağan säyäsätçelärneñ qaysıberläre dä deputat kenägäse öçen köç sınaşıp qararğa teli.Bikä Timerova.
