Accessibility links

якшәмбе, 11 декабрь 2016, Казан вакыты 03:30

Tatnet yañalıqları


Tatar internetın qullanuçılarına qaynar säläm!
Tatarlarnı berläşterüçe dönya päräweze buylap säyäxätkä räxim itegez.
Bügen bez sezneñ belän :
Tatar forumnarın uqıp, mäğlümäti höcüm häm «Azatlıq» radiosı tapşıruları turındağı bäxäslär belän tanışırbız.
Yaña açılğan başqort saytın gizep çığarbız.
«2003 yıl-tatarı» bäygesendä tawış birüneñ başlanu waqıtı xaqında äñgämäne işetersez.



Çeltärneñ tatar öleşe dä mäğlümat suğışı urınına äylänä bara. Bu könnärdä «tatar» süze kergän küpçelek internet säxifälärneñ forumnarı provaktasion mäqälälär belän tuldı. Anda «Tatarstan çeçennarnı yaqlawda kübräk qatnaşsın ide» digän çaqırular urın aldı. Läkin älege mäqällärdä ber millätne häm dinne mısqıl itkän süzlär bulğanğa kürä, küpçelek idäräçelär, forumnar qağidälärennän çığıp, alarnı bik tiz arada alıp taşladı. Läkin yazmalar yañadan elenä tordı, Niderland İP sanarın qullanğan älege keşe bik aktiv räweştä forumçılarnı mäqälälär xaqında fiker alışırğa çaqırıp tordı. Tatar gäzite, Virtual tatar klubı, İdel-ural.com portalı, tatarlar.ru saytı, Mäskäw tatar yäşläre berdämlege säxifäse dä bu höcümgä duçar buldı. Läkin täcribäle tatnetçılar, monı provakatsie dip isäpläp, bäxäskä kermädelär.

Bu atnada MTSS.ru forumında «Azatlıq» radiosında yañğıran mäğümätlär dä qaynar bäxäslär kiterep çığardı. Mäskäwdäge xäbärçebez Näzifä Kärimova tatar ictimaği oyışmalarnıñ eşe turında söylägän ide. «Watan» firqäse citäkçese Möxämmät Minaçev älege tapşıruğa qänäğätsezlek belderde. Anıñ notığın häm mäs’älädä kilep çıqqan bäxäsne www.mtss.ru/forum/ adresında taba alasız. Ä «Azatlıq» radiosı eşenä qarata turıdan turı fikeregezne belderergä teläsägez, räxim itep www.azaliq.org adresına kerep çığığız.

Şuşı könnärdä genä tatar cämäğätçelegenä, Amsterdamda yäşäwçe Röstäm äfändeneñ «Tuğan xalq» dip atala torğan saytı täqdim itelde. http://www.bashkortostan.net/tugan/modules/news/

«Tuğan xalq» saytı - başqortostan.net portalınıñ ber öleşe . Säxifä qullanuçılar öçen şaqtıy uñaylı itep eşlängän, yañalıqlar, fiker alışu bülekläre bar. Tekstlar kuril xärefläre belän, urıs häm başqort telendä birelä. İngliz telendäge büleklär dä bar. İdäräçe saytın «Tuğan xalq» dip atap, şuşı urında barlıq törki xalıq wäkillären berläşterergä teli. Röstäm äfände tatar-başqrotlarğa qarata möräcäğäten dä yazıp qaldırğan. «Tatar häm urıs telle forumnar aşa ber beregezne ezlägez, böten Evropa buylap tatar-başrot yaqtaşlıq cämğiätlären tözegez», di ul. «Virtual däräcädä bulsa da, Fransiä, Belgiä häm Finländiädä andıy eş belän şöğellänergä teläüçelär bar» dip yazılğan anda.

(http://www.bashkortostan.net/tugan/modules/news/article.php?storyid=3&page=1 )

Saytnıñ ğomumi adresı - . www.bashkortstan.net/tugan/

Ütkän tapşıruda, «2003 yıl tatarı» bäygesenä soñğı äzerlek çaraları kürelä, dip söylägän idek. Bu virtual bäygene oyıştıruçı, Mordoviädäge millättäşebez İrek Bikkinin bezgä tağın şunı xäbär itte: yaqın könnärdä tawış birü saytı açılırğa tieş. Anıñ belän telefonnan äñgämä ütkärdek. Xäzer şul söyläşüne sezneñ iğtibarğa da täqdim itäbez. İ.Bikkinin:

«Bezneñ tatar gazetası 2 serverda urnaşqan, berse Rusiädä, ikençese – Amerikada. İkesendä dä älegä problemalar kilep çıqtı. Xäzer tawış birü saytın başqa saytlarğa küçerü turında söyläşülär alıp barabız. Yaqın könnärdä ul açılırğa tieş. 2000nçı yıldağı bäygedä Marat Safin häm Alsu ciñde, 2001yılda - İrek Bikkinin häm Zulya Kamalova, 2002 yılda - Fändäs Safiullin häm Zilyä Wälieva. 2003 yıl tatarı isemenä Räfis Kaşapov, Nurmöxämmät Xösäyenov, Ayrat Ğiniätullin, Zahir Xakimov, Qäderle İmametdinov, Damir İsxaqov, Färit İdelle, Färit Möxämmätşin... Barlığı 8 keşe.« Yıl xatın-qızı» isemenä 1 genä keşe täqdim itelä – Amerikan ğalimäse Suzan Wertheim. Ul uzğan yılda tatar tele problemalarına bağışlağan dissertatsiä yaqladı, Qazandağı tatar zıyalıları anı belä, häm anıñ öçen tawış birer, dip ışanam. Tawış birü saytı äzer bulğaç, tatar säxifäläre aşa xäbär itärbez.



İrek äfände äytüençä, «2003 yıl tatarı» isemenä layıq nämzätlärne kürsätü äle soñ tügel. Teläüçelär bulsa, «Tatar gäzite»neñ konferensiäsen tabırğa tieş bula. Monıñ iñ ciñel yulı – ezläw säxifäse. Yäki tatar saytlarındağı bäyläneşlär aşa da çığıp bula anda. Adresı da bar: www.peoples.org.ru/tatar/



Axırda «Azatlıq» radiosınıñ web-säxifäsen qullanuçılar öçen, küñelle yañalıq. www.azatlıq.ru/foto adresın cıysağız, bu cäyen ütkärelgän «Tatar yäşläre könnäre»nnän 200än artıq fotoräsem taba alırsız. Bu eş Rusiä häm yıraq çit illärdä yäşäçe tatar yäşläreneñ üteneçläre belän eşlände.



Bu tapşırunı sez «Azatlıq» radiosında tıñlaw belän bergä, www.azatliq.org digän säxifäbezdä uqıy da alasız. Älegä saw-bulıp torığız. Kiläse comğağa qädär.

Bikä Timerova .

XS
SM
MD
LG