Accessibility links

якшәмбе, 11 декабрь 2016, Казан вакыты 09:11

2004nçe yılnıñ 1nçe yartısına Tatarstan gäzitlärenä yazılu sannarı bilgele buldı


Bügen - Rusiä matbuğatı köne. Şuşı kön uñayınnan Rusiäneñ mäğlümat çaraları ministrlığı häm Tatarstannıñ räsmi dairäläre dä jurnalistlarnı hönär bäyräme belän qotladı. Tatarstannıñ matbuğat köne isä 19nçı mayda bilgeläp ütelä. Rusiä matbuğatı köne «Vedomosti» gäziteneñ çığa başlawı belän bäyle bulsa, Tatarstan xäbärçelär hönär bäyrämen «Nur» gäziteneñ çığu köne belän bäyli.

Bäyräm könendä dä jurnalistlar 2004nçe yıllıqnıñ 1nçe yartısında da plannar qora. Gäzit jurnallarğa yazılu kompaniäse tämamlandı. Berençe urında haman da «Tatarstan yäşläre» gäzite bara. Bu basmağa 65 780 meñ keşe yazılğan. Uzğan yartı yıllıqta (yazılu 184 sum torğanda) tiraj – 69 999 meñ bulğan. Gäzit xezmätkärläre tirajnıñ kimüen, äbünäneñ 200 sumğa qädär artıp kitüe belän bäyli.

«Watanım Tatarstan» gäziteneñ tirajı – 37 meñ. Bu basma äbünäçelär sanın arttırğan äle. Uzğan yartı yıllıqta gäzitneñ ğomumi sanı 32 868 danä bulğan.

«Respublika Tatarstan» kebek räsmi gäzitneñ dä ğomumi tirajı berdä üzgärmägän diärlek. Yaña yılda da, ütkänendä dä gäzit 36 meñ danä belän näşriättän basılıp çıqqan.

Räsmi bulmağan «Aqçarlaq» gäzite çığu yışlığın arttıru belän bergä, tirajın da şaqtıy zurayttı. Atnalıq gäzit, ğomumi tiraj digändä, 26 meñlek sannı kürsätä.

«Şähri Qazan» gäziteneñ ğomumi tirajı - 7 meñ. Gäzit xezmätkärläre, äbünäçelärne Qazanda ğına tügel, respublika rayonnarında da ezläde. Läkin tiraj barıber kimede. Ütkän yartı yıllıqta gäzit 10 meñlek tiraj belän basılğan bulsa, bu yıldan başlap - 3 meñgä kimräk.

«Şähri Qazan» kebek ük, şähär basması bulıp sanala torğan «Kazanskie vedomsti» gäzite - ğomumi häm yazılu tirajların ayırıp kürsätä. Bu basmağa 9 meñläp keşe yazıla. Ä ğomumi tiraj – 9 594. Kürgänegezçä, bu «Şähri Qazan» gäziteneñ ğomumi basılu sanınnan da artığraq.

«Veçernyaya Qazan» – urıs telle gäzitlärdän iñ zur tirajlısı. Uzğan yartı yıllıqta ul 48 046 meñ danä belän çıqqan bulsa, bıyıl taralu kiñlegen – tağı da artıra töşkän. Bu usal telle säyäsi gäzitneñ tirajı – 50 142 meñgä citkän. Bu basmanıñ äbünäçelär sanı da artqan – 45 meñnän – 48 gä qädär.

Şunıñ belän bergä yaña gäzitlär dä barlıqqa kilep tora. Mäsälän «Bezneñ gäzit» 6 meñlek tiraj belän basıla başlağan. Tösle itep çığarıla torğan, ike yaqlı, sallı Säxnä jurnalınıñ tirajı zur bulmasa da, uzğan yılda matbuğat bazarında tanılıp ölgerde.

Tatarstan poçtası birgän mäğlümatlarına qarağanda, uzğan yartı yıllıqta, Tatarstan, gäzitlär-jurnallar sanı belän, Rusiä federatsiäsendä 1nçe urınğa çıqqan. Respublikada yäşäwçe här ber meñ keşegä 542 mäğlümat çarası turı kilä. Yäğni, küpmeder äbünäçelär sanın cıyu öçen dä, mäğlümat çaralarına ber berse belän nıq köndäşlek itärgä turı kilgän.

Bikä Timerova.

XS
SM
MD
LG