Accessibility links

якшәмбе, 11 декабрь 2016, Казан вакыты 01:24

Tatarstanda inde 124 keşe deputat bulırğa teläk belderde


Üzäk saylaw komissiäsendä köndä yañalıqlar bulıp tora. Soñğı mäğlümatlarğa qarağanda deputat bulırğa telägän keşelärneñ sanı

124-kä citkän. Barlığı 45 okrugta nämzätlär kürsätelgän. Yäğni 5 okrugta älegä saylanırğa teläweçlär yuq. «Tormış» firqäsendä 23 keşe ber mandatlı okruglardan häm 22-se isemlek belän saylanırğa teli. «Tormış» firqäseneñ berençe 3 keşese itep Qazanda bilgele şäxeslär kertelgän: yazuçı Rinat Möxämmädiev, jurnalist Yelena Çernobrovkina, ğalim Färit Xuzixanov.



«Kommunistlar eşçe» firqäse dä inde saylawlarğa kemne çığarasın xäl itep, dokumentların üzäk saylaw komissiäsenä tapşırğan. Bu partiäneñ isemlegendä berençe 3 urında arbitraj idäräçe Rif Zarifullin, ber institut direktorı Mixail Kaçev häm pensioner Fändäs Safiullinnı kürep bula. Bu firqä barlığı 29 firqä wäkilen parlamentta kürergä telär ide. Ğadi kommunistlar firqäse 68 keşene deputatlıqqa täqdim itä. Firqä isemlegendä berençe 3 urınnı – elekke Duma deputatı Aleksandr Saliy, häm cirle kommunistlar Näsimä Stolyarova häm Robert Sadıqov bili.

Saylaw aldı qırındağı töp uyınçı – «Berdäm Rusiä» firqäse tarafdarları şuşı könnärdä komissiälärgä dokumentların tapşıra başlar dip kötelä.

İnde xäbär itkänebezçä, xakimiät partiäse 49 keşene firqä isemlege belän, ä 42-sen 1 mandatlı okruglarda saylatırğa teli. Ber Qazan gäzite, şuşı 42 keşeneñ 5-se başqa nämzätlärne qızıqtırmağan awıl saylaw okrugında saylanırğa teläk belderer, digän faraz qordı. Bu sorawğa cawapnı inde yaqın könnärdä uq belerbez. «Berdäm Rusiä» firqäse wäkilläre, şuşı könnärdä, matbuğat oçraşuın ütkärep, saylawlarğa qağılışlı sorawlarğa cawap birergä wäğdä itte.

Üzäk saylaw komissiäsendä «Rodina» saylaw blogınnan da saylanırğa teläweçlärneñ kilüen kötälär. Jirinovskiy firqäseneñ Tatarstan bülege dä, parlamentqa ütep kerergä teli, şuña saylawçılarnıñ bu firqä wäkillären dä saylaw aldı çorında kürü mömkinlege bar.

Ber mandatlı okruglarda da köräş şaqtıy kierenke bulırğa oşıy. Deputatlıqqa layıq keşelärneñ barısına da caylı okruglar citmägän küräseñ. Mäsälän Yäşel Üzändä Midxät Qormanov häm Sergey Oskolok kebek ikese dä tanılğan deputat köç sınaşırğa uylap tora. Nämzätlär arasında ber tuğan İşkuvatovlarnı da, xoquq yaqlawçı Anatoliy Vasilyevnı, kommunist Nikolay Korobkovnı da kürergä mömkin bulaçaq.

Bikä Timerova.

XS
SM
MD
LG