Accessibility links

дүшәмбе, 5 декабрь 2016, Казан вакыты 07:42

Keräşen tatarlarınıñ bäyräme


İske kalendar' buyınça Yaña yıl könne Salix Säydäş muzeyında Raştua bäyrämenä bağışlanğan bik matur kiçä bulıp ütte. Törle yäştäge keräşen tatarları, kübesençä ölkännär bügen bik küñelle, cılı oçraşuda qatnaştılar. Kiçäne Gennadiy Makarov, Agrafena Vasileva häm keräşen cır ansambleneñ qızları-yegetläre alıp bardı. Kiçädä Agrafena Vasil'eva Gennadiy Makarovnıñ İisus Xristosqa, tormışqa, adäm balasına bağışlap icat itkän küp kenä şiğerlären uqıdı. Kiçä cır-moñ belän ürelep bardı. Cır ansambl'neñ talantlı yäş qızları İisusnı iskä töşerep “İisusnı naxaqta ğäyeplәgännär”, “Аllаli belän Züllаli” häm tağın küp kenä cırlar belän çığış yasadılar. Alarnıñ moñnarına quşılıp, Gennadiy Makarov häm ansambl'neñ yegetläre qıllı muzıkal' instrumentında uynadılar. Ber arada Agrafena Vasil'eva üzeneñ yäş çaqtan istä qalğan Narduğan könnärendä küräzälek itü törläre turında söyläp, bigräk tä yäş qızlarğa citkerergä tırıştı. Alar arasında qapqa aşa yeget isemnäre yazıp tutırılğan iteklär ırğıtu, qarañğı munçada şäm yaqtısında itä torğan küräzälär häm başqalar bar ide. Keräşen tatarlarınıñ olı bäyrämen xalıqqa da citkerü maqsat belän Efir telekompaniäse jurnalistları kilgän ide. Çığış yasağan yäşlär arasınnan bigräk tä Lyudmila isemle bik talantlı qız turında da äytep kitmiçä bulmas. Lyudmila Stepanova Qazanğa Leninogorsk rayonınıñ Fedotovka awılınnan kilgän. Elek bu awılnı kürenekle tatar şağire , Tuqay büläge iäse Gäräy Räxim yäğni Grigoriy Radionovnıñ tuğan cire bularaq belälär ide. Lyudmila Stepanova anda pedagogiä uçilişçesın tämamlıy, muzıka öyränä. Älegä 22 yäşlek qız Qazan pedagogiä universitetında uquın däwam itä. Sälätle, ömetle keräşen qızı uqıtuçı hönären üzläşterü belän bergä, şiğerlär dä yaza, cırlıy, üzeneñ talantın cırlar icat itüdä dä sınap qarıy. 2000nçe yılda Lyudmilanıñ “Berençe qar” isemle şiğerlär häm cırlar cıyıntığı basılıp çıqtı. Kiçä axırında Çallıdan kilgän “Tuğanaylar”isemle ictimaği-säyäsi keräşen gäciteneñ baş redaktorı Antonova Zinaida Petrovna qısqa ğına çığış yasap, keräşen ansamblenä räxmäten belderep, üze belän alıp kilgän keräşen kalendare, gäcitlär taratıp çıqtı. Kiçädä yasalğan çığışlardan tamaşaçılar qänäğät bulıp qaldı, tağın da oçraşırğa kileştelär. Keräşen tatarlarınıñ muzıkası Säydäş torğan yortta da bik matur yañğıradı.

Al’bina Zәynulla

XS
SM
MD
LG