Accessibility links

чәршәмбе, 7 декабрь 2016, Казан вакыты 13:44

Yuğarı Oslanda tatar tele niçek uqıtıla?


Däwlät Şurasınıñ Fän, mäğärif, mädäniät häm milli mäs’älälär buyınça daimi komissiäse soñğı arada şaqtıy zur aktivlıq kürsätä. Menä bu yulı da Yuğarı Oslan rayonına barunı alar oyıştırdı. Älege rayon mäktäplärendä respublika xalıqları telläre häm Mäğärif turındağı qanunnarnıñ ütäleşen tikşerüdä şulay uq Mäğärif ministrlığı häm Bötendönya tatar kongressı wäkilläre dä qatnaştı. Ministrlıqnıñ bülek citäkçese Radik Zaripov süzlärenä qarağanda, tatar telendä uqıtu alıp baru öçen dä, telne öyränü öçen dä älege rayonda şartlar bar, tatar tele kabinetları şaqtıy äybät cihazlandırılğan, däresleklär belän dä mäktäplär tulısınça tä’min itelgän. Älbättä, citeşmäwçänleklär dä yuq tügel. Alalar arasında däresleklärneñ eçtälegen kamilläşterü, yäş belgeçlärneñ belem birü däräcäsen kütärü kebeklären äytep kitep bula. Citmäsä, Yuğarı Oslan – nigezdä urıslar yäşä torğan rayon. Alar rayonda yäşäwçelärneñ 70 protsentın täşkil itä. Tatarlar isä 20 protsent tiräse genä. Şuña da, tatar telendä uquçı balalarnıñ sanı nibarı 73 keşe, alar 3 tatar mäktäbendä uqıylar. Älege tikşerüneñ näticäläre turında deputatlar comğa könne komissiä utırışında centekläp söyläşergä niätläp toralar. Şuña kürä, bu xaqta bez dä sezgä 16nçı ğinwar xäbärlär tuplanmasında citkeräbez.



Bügenge yazmada isä, x.t., sezne Mäğärif ministrlığınıñ Tatarstan xalıqları telläre turındağı qanunnı tormışqa aşıru maqsatınnan ütkärelä torğan tağın ber çarası belän tanıştırıp kitäse kilä. Süz här yılnıñ ğinwar ayında respublika külämendä oyıştırıla torğan Rizaetdin Fäxretdingä bağışlanğan pedagogik uqular turında bara. Bıyıl alar 200dän artıq mäğärif ölkäse xezmätkärläre qatnaşlığında Tübän Kama mäktäplärendä uzdı. Tanılğan yazuçı, pedagog Rizaetdin Fäxretdinneñ xezmätläre bügenge köndä mäğärif xezmätkärläre tarafınnan uqıtu häm tärbiä eşlärendä kiñ qullanıla ikän. Şuña da, älege uqular anda qatnaşuçılar öçen ayıruça ähämiätle bulğan. Mäğärif ministrlığınıñ töp belgeçe Ğäynetdinova Gölfiä Änwär qızı süzlärenä qarağanda, Rizaetdin Fäxretdinneñ icatı, anıñ pedagogik xezmätläre xaqında tuplanğan bay materiallar nigezendä kiläçäktä kitep näşer itü niätlänä ikän. Şulay uq, ministr Faris Xarisov täqdime buyınça mäğärif xezmätkärläre öçen ğalim isemendäge premiä, ä studentlar öçen Rizaetdin Fäxretdin isemendäge stipendiä buldıru da tormışqa aşaçaq. Ä fevral ayında isä Älmättä ğalim icatına bağışlanğan fänni-ğämäli konferensiä ütäçäk.



Gölnaz İlgizär

XS
SM
MD
LG