Pänceşämbe könne çıqqan gazetalarnıñ iñ “säyäsiläşterelgäne” ğädättägeçä Zvezda Povolj''ya inde. Küptän tügel anıñ alışınmas möxärrire Räşit Äxmätovqa 50 yäş tuldı. Atna başında “Tatmedia”da uzğan jurnalistlar mäclesendä Däwlät Şurası räise Färit Mäxämmätşin anı “Afärin!” dip maqtap qimmätle galstuk büläk itte. Räsmi xaqimiät anı Maqtaw gramotası belän dä büläklärgä niätlägän, läkin Räşit Äxmätov baş tartqan. Çönki Zvezda Povolj''yaTatarstanda iñ oppozitsion gazeta häm anıñ baş möxärrire şundıy yağımlı bozaw ike ananı da imä, digän prinsip belän yäşi, tegelärgä dä yarıy, bolarğa da yarıy. Kem närsä kitersä – şunı bastırıp çığara. Äytik, uzğan sanında ul TİÜ räisen wazifalarınnan buşatıluı turında yazıp çıqqan ide. Ä bu sanında şul xäbärne inqar itüçe yazma çığardı. Möxärrir bağanasında ul iñ başta prezident apparatı citäkçesen borğalap-sırğalap maqtıy, eşlärne aqıllı alıp baruı turında, anıñ küptän tügel Duslıq ordenı belän büläklänüe turında yaza. Şunnan soñ ul prezident apparatınıñ xäzerge waqıtta iñ töp mäşäqäte - parlament saylawlarına äzerlektä xataların kürsätä. İmeş, saylanası parlamentta Qazan şähäre administratsiäse başlığı ütkärgän deputatlar 1/3 öleşen täşkil itäçäk häm xälitkeç tawışqa iä bulırğa mömkin. Şulay itep, parlament, xökümät qararların ütkärmäw mömkinlegenä iä bulaçaq.
Ä inde iñ kisken sotsial'' problemağa - yaña yıldan soñ bäyälär kütärelü problemasına sallı itep Tatarstan yäşläre yaza. Mäğlüm ki, yaña yılnıñ berençe eş könendä ük Tatarstanda 5 protsentlı satuğa östämä salımnı ğämäldän çığarğan Prezident ukazı çıqtı. Läkin kibetlärdä bäyälär ber tiengä dä töşmäde. Şul uq waqıtta Mäskäwdän toraq öçen tüläwlär artu turında xäbärlär kilä başladı. Tatarstan yäşlärendäge mäqälä “Äy räxmät” dip atala. Bäyälär kütärelüdän qurıqmıybız bit bez, dip başlana mäqälä. Şulay itep, bezneñ xalıq mixnätkä künekkän, mäcleslärdä dä az räxätkä, küp mixnätkä tüzä adäm balası dip cırlıybız inde. Bäyälär kütärelüne xalıq ğädättägeçä bireşmiçä, şöpxälänmiçä qarşı ala äle.
Yunıs Ätnäle.
