Accessibility links

чәршәмбе, 7 декабрь 2016, Казан вакыты 13:48

Rusiä premyer-ministrı urınbasarı Boris Aleşin Blagoveçen şähärendäge "Polief" şirkäte tözeleşe belän qızıqsına


Yaña yılğa totaşıp kitkän bixisap bäyrämnärdän soñ Başqortstanda da ğädäti eş – mäşaqätlär, xästärleklär başlandı. Atnaqiç, Däwlät Cıyılışı – Qorıltay utırışında deputatlar prezident Mortaza Räximovnıñ täqdimen xuplap, yañadan Rafael Baydäwlätovnı premer – ministr itep täğayınlägäç, respublik xökümäte dä üz wäqälätlären räsmi üti başladı. Qorıltay utırışı tämamlanuğa, Ufağa Rusiä vitse – premyerı Boris Aleşin ike könlek eş säfäre belän kilep töşte. Kiçen ul respublik citäkçelege belän oçraşıp üzeneñ Başqortstanğa kilüye maqsatları turında söyläde. Aleşin äfändeneñ bu kilüye küpmeder däräcädä Başqortstan citäkçelege çaqıruı buyınça da ikän. İnde 80 nçe yıllardan birle Başqortstannıñ Blağoveçen şähärendä Rusiädä şul tördäge berdänber «Polief» isemle bik zur şirkät tözelep yata. Ämma federäl däräcädä sanalğan bik qolaçlı bu ob'yektqa Mäskäw finanslar bülmäw säbäple, tözeleş bik aqrın bardı, «saqallı» tözeleşkä äylände ul. Başqortstanğa moña qädär kilgän başqa vitse – premyerlar bu problemnı xäl itäbez dip ışandırıp kitä dä, bik tiz genä onıta ide. Äle Ufağa kilgän Boris Aleşin bu mäsäläne tikşerügä nıqlap totınu omtılışı kürsätä. Comğa kön irtän ük ul Başqortstan prezidentı Mortaza Räximov, premyer – ministr Rafael Baydäwlätov häm başqa citäkçelär ozatuında Blağoweşçen şähärendäge şuşı «Polief» şirkäte tözeleşenä kilde häm andağı xällär belän tanıştı. Tözeleş suzılğan ike distä yıl eçendä biregä çit illärdän qaytarılğan ällä küpme millionnarça sumlıq cihazlar açıq hawada torıp tutığıp – çerep betkän inde. Ozaq qına yörep, tözeleşne qarap çıqqannan soñ, yuğarı citäkçelär kiñäşmägä cıyıldı häm anda Rusiä witse – premerı tiz arada uq bu tözeleşneñ berençe çiratın faydalanuğa tapşıru öçen yärdäm bülenäçägen äytte. Tağın wäğdä bulıp qına qalmasa yarıy inde. Comğa kön töştän soñ Mäskäw qunağı Ufadağı motorlar eşläw berläşmäsendä häm «Gidravlika» dip atalğan ağreğat şirkätendä dä buldı häm alardağı xällär belän dä tanıştı. Motorlar eşläw berläşmäsendä awiatsiä öçen dwiğätellär citeşterüne arttıru mömkinlekläre turında söyläşülärdän Başqortstan citäkçelege qänägät qaldı. Bu eştä dä Mäskäw yärdäm qulın suzaçaq kebek kürenä.

XS
SM
MD
LG