Accessibility links

чәршәмбе, 7 декабрь 2016, Казан вакыты 13:48

"Şärıq – şow" tağın talantlarnı cıydı


15 ğinwar könne Ufada yıl da uzdırıluçı «Şärıq – şow» konsertları başlandı. Başqortstandağı kiñ bilgele «Roksana» radiosınıñ tatar häm başqort tellärendäge «Şärıq» qanalı xezmätkärläre oyıştıruçı bu bäyräm respublikta yaña yıl başlanıp kitkän waqıtta bik küñelle, tantanalı waqıyğağa äwerelä. Här yıldağıça, bıyılğı tamaşalar da başqala üzägendäge mähäbät Neftçelär mädäniät sarayında bara. 12 nçe yıl rättän oyıştırıluçı bu iskitkeç matur mädäni çaranıñ berençe konsertı atnaqiç könne kiçke cidedä başlanıp dürt säğät buyı däwam itte. Kemnär genä yuq ide anda! Tatar häm başqort xalıqlarınıñ milli ğorurlığına äwerelgän legendar cırçılardan başlap, äle yaña ğına zur säxnägä menüçe, ämma şaqtıy populyar yäş başqaruçılar da çaqırılğan älege cır – moñ bäyrämenä. Tatarstannan da, här yıldağıça, säxnä yoldızlarıbız «ber qoçaq» kilgän. Mäşhür İlham Şaqirov, Zöfär Bilalov häm Zäynäp Färxetdinowa, Xämdünä Timerğäliewa, Göldaniä Xäyrullina, Firzär Mortazin, İlham Şärif häm başqalar, Mäskäwdän «İzge ay» törkeme citäkçeläre Xalidä Bigiçewä belän Rawil Quznetsov, şulay uq Çallıdan da tanılğan sänğätkärlärne kürü bäxetenä ireşte Ufa tamaşaçısı. «Şärıq – şow» tamaşaları ber atna buyı däwam itäçäk. Tatarstan, Mäskäw artistlarınıñ kübese, şul isäptän İlham ağa Şaqirov ta Ufada här könne çığış yasayaçaq. Şulay itep, bu könnärdä Tatarstannıñ sänğät yoldızlarınıñ zur ğına öleşe Başqortstanğa küçte disäñ dä bula. Bu atnada Tatarstannıñ xalıq artistı Xäniä Färxi dä Başqortstanda eş säfäre belän yöri. «Şärıq – şow» tamaşalarında qatnaşmasa da, Xäniä xanım bu bäyrämneñ berençe könendä säxnägä menep, «Roksana radiosı citäkçese Serop Babayanğa, tatar häm başqort cır sänğäten üsterügä salğan xezmätläre öçen, räxmät yözennän çäçkälär göllämäse büläk itte. Xäniä Färxine tizdän Başqortstan tamaşaçıları ayırım konsertları belän küräçäk. Xäniä xanım citäklägän «Bäyräm» ansamble Ufada 13 fevräldän un kön rättän «Cırlarımda – sezneñ yazmışlar» dip atalğan konsert proğramması belän çığış yasayaçaq.

Fänis Fätxi, Ufa

XS
SM
MD
LG