Accessibility links

шимбә, 10 декабрь 2016, Казан вакыты 08:09

Bagdadta yaña şartlaw - kimendä 23 keşe hälak buldı, 60-tan artığı yaralandı


Bügenge kön dä Bagdadta tınıç qına ütmäde, xörmätle tıñlawçılar. İntihar höcümçeneñ şartlatqıçlar tutırılğan keçkenä yök maşinası belän amerikan ğäskärläreneñ Ğiraq başqalasındağı töp nığıtması tiräsenä bärep kerüe näticäsendä 20-dän artıq keşe hälak buldı.

Uzğan ayda Saddam Xösäen totılğannan birle bu çit il xärbilärenä qarşı yasalğan iñ dähşätle höcüm buldı. Berniçä kön elek kenä amerikan yağı, soñğı aralarda andıy höcümnär sanı kimede digän quanıçlı belderülär yasağan ide. Bügen hälak bulğannar arasında Quşma Ştatlarnıñ saqlanu ministrılığı öçen eşlägän ike keşe dä bar dip xäbär utelä. Läkin qorbannarnıñ kübesen amerikan nığıtmasında eşlägän häm binağa kerü aldınnan tikşerü ütüne kötep torğan ğiraqlılar täşkil itte. Nığıtma binası üze şul tikşerü urınınnan ber çaqrım yıraqlıqta urnaşqan. Şartlaw maşinalar ütep kerü röxsät itelgän binağa iñ yaqın cirdä bulğan. Amerikan ğäskärläre anda, andıy höcümnärgä qarşı qorılğan beton diwar artında tora, şuña kürä dä alar arasında bu yulı yuğaltular yuq. Quşma Ştatlarnıñ Bagdadtağı xärbi wäkile Ralph Baker şartlaw turında bolarnı belderde:

Audio, Ralph Baker

"Biredä ber şartlaw buldı. "Toyota" maşinasında xärbi qullanıştağı yaqınça 450 kilo şartlatqıç quyılğan bulğan. Bu yulı höcüm näticäsendä atışlar bulmadı. Bomba şartlawğa ğäskärilär saqlanu çaraların kürde häm kiçekmästän ğiraqlılarğa berençe yardäm kürsätä başladı dip sürätli bügen Bagdadta bulğan höcümne Palph Baker. Ğiraq başqalasındağı xäbärçelär şartlaw urınında kiñlege 3 metrlıq çoqır barlıqqa kilüe xaqında yaza. Şul çaqta amerikan nığıtmasınıñ tikşerü urını yanında bulğan ber ğiraqlı, Wissam Möxämmäd Şakir, höcümne bolay sürätli:

Audio, Möxämmäd Şakir

"Şartlaw min ütep barğanda buldı, keşelärne hawağa oçırıp, turaqlap... öçese mona, bişese tegendä... Amerikannar bezne şunda uq kire çigenderde. Minemçä, ülgännärneñ barısı da anda, amerikan nığıtmasında eşläwçelär ide" di höcümne kürgän ğiraqlı. Ber kön elek Quşma Ştatlarnıñ Ğiraqtağı xärbi citäkçelege, ildäge amerikan ğäskäriläre sanın kimetergä, aldağı 4-6 ay eçendä anı 130 meñnän 105 meñgä qaldırırğa teläwe xaqında beldergän ide. Moñardan tış Waşington Ğiraqtağı awır xärbi texnikanı häm qorallarnı, partizan suğışına kübräk turı kilgän zamança wä citez xäräkätçän maxsus bülekçälär belän almaştırırğa teli. Bügenge höcüm şul partizan suğışınıñ ber misalı bulıp tora.

Kärim Kamal, Praga
XS
SM
MD
LG