Accessibility links

пәнҗешәмбе, 8 декабрь 2016, Казан вакыты 11:09

Tatnet: dönya päräwezendä işetelä torğan tatar awazları


Tatnet qullanuçılarına häm «Azatlıq» radiosı tıñlawçılarına qaynar säläm. Çeltärneñ tatar öleşenä bağışlanğan tapşıruıbıznıñ yaña çığarılışın sezneñ iğtibarğa täqdim itäbez.



Bügen bez sezneñ belän çeltärdä işetelä torğan tatar awazları xaqında söyläşerbez. :

«Tatar radiosı» internettağı säxifäsen yarattı häm çeltärdä dä tapşırıla başladı.

Bügen şulay uq tatar forumnarın gizep çığarbız.

Amerika tatarları saytı häm Mäshüdä Şämsetdinovanıñ web-säxifäläre belän tanışırbız.





Qazanda FM dulqınnarında eşläwçe «Tatar radiosı» şaw-şulı reklama kampaniäsen ütkärep, tapşıruların çeltärdä tapşıra başlaw häm

tatarradio.ru/ adresındağı säxifäsen yañartuı xaqında xäbär itte. «Tatar radiosı» säxifäse moña qädär dä bar ide. Yañası iskesennän, tizräk açıluı häm bizäleşe belän yaxşı yaqqa ayırılıp tora. Täwge bittä - Qazan räseme, FM-yışlıqınıñ sannarın -100,5 FM digän yazunı kürep bula. Saytta dönya häm şou-biznes yañalıqları, tarix, top10: muzıykal «qaymaq» xitparadı kebek qızıqlı säxifälär qaralsa da, alarnıñ berse dä eşlämi älegä. Sayt idäräçeläre, qullanuçılarnı bu xaqta kisätep tä quya: «Sayt eşlänep betü däräcäsendä, täqdim-fikeläregez bulsa, qunaqlar kitabına yazıp qaldırığız», digän süzlärne, şunda uq, yögerek yulda uqıp bula.

Qunaqlar kitabına da kerep çığıyq: http://tatarradio.ru/cgi-local/faqt.pl



İnternetta tapşıruların başlağaç, «Tatar radiosı» dönya tatarlarnı berläşterüçe iñ zamança mäğlümat çarası rolen üti başlarğa mömkin. Äle küptän tügel genä on-line rejimında eşli başlağan radionıñ dönyanıñ ällä niçä ilendä daimi tıñlawçıları barlıqqa kilgän. Menä säxifäneñ qunaqlar kitabındağı yazularnıñ ber niçäsen genä uqıp qarıq. «Amerikanıñ İndiana ştatınnan «Tatar radiosın» tıñlaw mömkinlege bulu – minem öçen zur şatlıq», dip yaza Aynur. Estoniädän Ğarifulla äfände dä çeltärdän «Tatar radiosı»n tıñlaw mömkinlegenä şatlana. ««Dulqın radiosı» yuğalğaç, başqası açılır, dip inde küptännän kötep torğan idek», digän yazu qaldırğan ul. İsemen kürsätergä telämägän ikençe ber keşe « min sezne Latviädän tıñlıym» digän. Finländiädän ällä niçä yazunı kürep bula :«Sälam sezgä Finländiädäge tatar kilennärennän», dip yazıp cibärgän Änisä Sabir-Tuganay. «Sezneñ «Tatar radiosı»n internetta räxät kenä tıñlap bula, bik şatlandırdığız, räxmät sezgä, dip xäbär itä Kanadadan Ayaz Ağiş. «Tatar radiosı»nıñ çeltärdäge tapşırularına niçek itep totaşu turında säxifädä bäynä-bäynä yazılğan.



Bu mäğlümat çarası «çeltärdä dä bez berençe» dip iğlan itsä dä, tatar FM-stansiälärennän berençelärdän bulıp, on-line rejimğa «Dulqın radiosı» çıqqan ide. Ämma tapşırular ozaqqa barmadı, radio üze dä, çeltär aşa tapşıruları da tuqtadı. «Azatlıq» radiosı da çeltärdä tapşırıla. Bezneñ programmanı säxifäbez aşa Qazan waqıtı belän kiçke säğät 7-dä häm 11-dä, annan irtänge 7dä häm 9da turı efirda işetä alasız. Yäki inde yañğırağan tapşırunı üzegez kompyuterığızğa suırıp alıp, üzegez telägän waqıtta tıñlarğa mömkin. www.azatliq.org.



Bu atnada Tatnetta yaña säxifä açıldı. www.tatars.com. Bu säxifäneñ adresınnan uq, anıñ tatarlar turında buluın çamalap bula. Ämma, açıp qarasaq, www.tatars.com Amerikada yäşäwçe tatar kompozitorı Mäshüdä Şämsetdinovanıñ şäxsi internet säxifäse genä bulıp çıqtı. Häm älegä ul ingliz telendä genä. Säxifäneñ urıs häm tatar telendäge bitläre äle eşlänep citmägän. Älegä anda Mäshüdä xanım turında ğomumi mäğlümlät belän tanışıp bula, anıñ üzeneñ foto räsemen, Amerikadağı tatar assotsiatsiäsendäge oçraşulardan qayber mizgellärne kürergä mömkin .



Mäshüdä Şämsetdinovanıñ citdi muzıykal äsärlären häm Qazannan tapşıruların alıp baruçı «Tatar radiosı»n Amerikadağı tatar yäşläre tıñlap xozurlana mikän, bezgä bilgesez. Ämma alarnıñ tatarlıqların onıtmawı turında äytergä tulı xoquqıbız bar.



Küpçelek tatar forumnarınıñ aktiv qullanuçısı Raxmetov äfände, bu atnada amerika tatar yäşläreneñ saytı belän tanışırğa täqdim itte. Häm tatar gäziteneñ forumında Amerika yäşläre yasağan adresnı qaldırıp kitte. www.tatar-usa.com.ru/ säxifäse üzen - «Amerika häm başqa çit illärdä yäşäwçe tatarlarnıñ tormışına bağışlanğan server» dip tanıta. Bu saytta yañalıqlar, muzıka, tanışular, chat kebek büleklär bar, ämma eşlämi. Barı tik forum bülege daimi räweştä yañarıp tora. Amerikadağı tarar yäşläre kübesençä urısça yazışa ikän. Ara-tirä tatarça süzlärne dä qıstıralar. İñ soñğı yazunı: Los-Angeles tan yıraq bulmağan Loncaster şähärendä yäşäwçe 18 yäşlek El’vira qaldırğan. Söyläşü «Öygä qaytası kilä» digän tema tiräsendä bara. «Äbiemne sağındım., duslarımnı....» dip yazıp qaldırğan El’vira. Forumçılarnıñ qaysıberläre, «aña sabır bul, bez dä sağınabız», dip teläktäşlek kürsätsä. Başqaları «Ul xätle sağınsağız nigä monda kildegez», dip belderä. Öçençe beräw – internet aşa tatar radioların tıñlap, tuğan yaqqa susawnı basarğa täqdim itä. Amerika tatarları saytınıñ adresın qabatlıym -www.tatar-usa.com.ru/

Tapşıruıbız şunıñ belän tämam. Kiläse comğada qabat oçraşırbız.

Bikä Timerova.

Bike@azatliq.ru

XS
SM
MD
LG