Accessibility links

шимбә, 3 декабрь 2016, Казан вакыты 20:54

Tawdan xäzer Tatarstanda da şuıp bula


Düşämbe Tatarstan xäbärläre tuplanmasın uzğan atna axırınıñ xäbärläre belän başlıybız, x.t. Comğa kiçendä Tatarstannıñ Yuğarı Oslan rayonında yaña sport kompleksı açıldı. Başqaladan 35 kilometr yıraqlıqta İdel, Zöyä häm Sölçä yılğaları quşılğan urında urnaşqan älege sport mäydanı Qazan dip atala. Anda berniçä zamança cihazlanğan taw çañğısı trassaları yasalğan. Bu kompleksnı açu bäyrämenä respublika prezidentı Mintimer Şäymiev tä kilde. Monda ul tantana waqıtında qotlaw süzlären äytü belän genä çiklänmiçä, sport kiemnärenä kienep, çañğığa basıp, trassalarnıñ bersen sınap ta qaradı. Qazan sport kompleksın tantanağa kilgän Mäskäw qunaqları da bik yuğarı bäyälädelär. Rusiä Olimpiä komitetınıñ vitse-prezidentı Vladimir Loginov, mäsälän, älege üzäkne il külämendä iñ yaxşı taw çañğısı üzäge dip bäyäläde. Älegä monda yal itüçelär öçen sport kiemnäre kibete, satıp alırğa aqçañ citep betmäsä, alarnı waqıtlıça alıp toru urını, aşaw-ecü, yuınu, yal itü urınnarı eşli. Kiläçäktä isä üzäktä şulay uq şuğalaq, tawğa kütärelä caylanmaları, qunaqxanälär açılaçaq, dip xäbär itä İntertat.ru säxifäse. Qazan sport kompleksı säğätenä 2 meñgä qädär keşe qabul itä ala. Läkin ul üzeneñ tulı mömkinlegenä eşli aluı şaqtıy ikele. Çönki taw çañğısı – qıybatlı sport töre. Älege üzäktä dä bäyälär arzan tügel. Mäsälän, monda yal könnärendä köne buyı şuar öçen 2 meñ tiräse sum aça kiräk.



Gölnaz İlgizär

KamAZnı Afrika çüllärendä dä belälär

Qazan sport kompleksın açuda şulay uq respublikanıñ tanılğan sportçısı, premyer-ministr Röstäm Miñnexanov ta qatnaştı. Xäyer, aña bu könne ozaqlap taw çañğılarında şuarğa turı kilmägänder. Çönki 17 ğinwar, könne irtän ul räsmi vizit belän Senegalğa kitte. Tatarstan xökümäte Afrika illäre belän xezmättäşlekne üsterergä niätli. Şunlıqtan, vizitnıñ töp maqsatı bulıp Senegal bazarına respublikada citeşterelgän tawarlarnı çığaru. Bu bigräk tä KamAZ maşinalarına qağıla. Şunısın da äytergä kiräk, Parij-Dakar-2004 bäygesendä KamAZ avtomobillärendä ciñügä ireşkän Tatarstan komandası da bu eşkä üzeneñ şaqtıy zur öleşen kertkänder, moğäyen. Xäzer Senegallılar älege maşinalarnıñ eştä nindi ikännären inde çamalıy. Dimäk, alarnı satu da tatarstanlılarğa ciñelräk bulır. Röstäm Miñnexanov citäkçelegendäge räsmi delegatsiä üzeneñ eş säfären düşämbe könne tämamlap, Qazanğa qayttı. Ä menä avtouzışlarda ciñgän komanda Tatarstanğa sişämbe könne genä qaytıp citäçäk. Xäyer, alar äle yıraqta buluğa da qaramastan, ciñüçelärne inde qotlıy da başladılar. Mintimer Şäymiev ciñü uñayınnan KamAZ-Master komandası citäkçese Semen Yaqubovqa häm KamAZ cämğiäte general direktorı Sergey Kogoginğa telegramma cibärde. Anda prezident yıraq Afrika illärendä respublikanı tanıtqan, awır şartlarda da sınatmağan öçen KamAZ-Master komandası äğzalarına räxmät beldergän häm alarğa kiläçäktä dä uñışlar telägän.



Afrika illäre belän üzara mönäsäbätlär äle başlanıp qına kilsä, Könyaq Koreya belän Tatarstannıñ xezmättäşlege inde uñışlı ğına däwam itä. Düşämbe könne Tatar-Koreya nefteximiä kompaniäsen oyıştıru mäs’älälärenä bağışlanğan oçraşu uzdı. Älege kompaniä Tatarstan respublikası nefteximiä häm neft eşkärtü sänäğäte tarmağına yaña investitsiälär cälep itü häm anıñ üseşen tä’min itü öçen buldırıldı. Anı Tatneft, TübänKamaneftexim, Svyaznefteximinvestxolding häm Könyaq Koreyanıñ LG kompaniäse oyıştırdılar.



Gölnaz İlgizär

XS
SM
MD
LG