Accessibility links

сишәмбе, 6 декабрь 2016, Казан вакыты 17:20

Sember prokuraturası oyıştırğan matbuğat konferensiäsendä cinayätçelekneñ torışı turında süz bardı


Sember prokuraturası oyıştırğan matbuğat konferensiäsendä uzğan yılda cinayätçelekneñ torışı turında süz bardı. Yıl däwamında 600 keşe üterelgän, cinayätçelek 4 protsentqa artqan. Xäyer, monı härkem üz tirese belän sizä – yañalıq tügel. Ä menä iske awızdan yaña süz: “Djamaat” (Cämäğät) isemle törkem äğzaları älegä barı tik talaw, razbuylarda ğına ğayıplänälär. Alarnıñ radikal İslamğa qağılışlı buluları turında süz yörtergä irtäräk. Dini tikşerülär ekspertizası bara. Yuğisä, niçek banditlıqqa öyränülären, Rusiä soldatların cäzalawların töşergän videokassetalar turında awız tutırıp söylärgä ölgerdelär iç inde. “Ul'yanovskaya pravda”da basılğan mäqäläneñ iseme ük Çeçenstannan kilgän xärbi svodkanı xäterlätä: “Banditov vzyali bez yedinoğo vıystrela”. Gäzitkä ışansañ, alar “terror aktlarına äzerlek alıp barğannar, verbovka belän şöğıllängännär, üz tirälärendä tuplanğan bandada “Azat islam” ideyälären taratqannar, fidain-şähitlär äzerlägännär”. Dimäk, bolar barısı da yalğan bulıp çığa. Niçek bulsa da bu yalğannı aqlarğa tırışıpmı inde, köç strukturalarınıñ yañadan-yaña tentülär, “s pristrastiem” soraw alular oyıştıruı turında xäbärlär taraldı. “Azatlıq” radiosı aşa Semberdä päräncä belän yörüçe berniçä xatın turında fikerlär, alarnıñ irläre belän äñgämälär birelgän ide inde. Alarğa da çirat citkän ikän. Şul päräncälelärgä bäyläneşle ber ğailädä tentü bulğanın işetkäç häm telefon aşa ğına mäğlümat alıp bulmağaç, öylärenä barırğa turı kilde. Bik tä qurqıtılğannar, küräseñ. Tik qurqularınıñ säbäben genä añlatudan baş tarttılar. İsemnären dä äytmäwne soradılar. “Päräncäle” tanuç yegetlärneñ “tieşle urınnarda” soraw aluğa duçar buluları, anda alar belän bik naçar möğamälä qılğannarın äyttelär, läkin bu naçarlıqnıñ nidän ğibarät bulğanın äytmädelär. Tentüçelär ğaräp imlyasında bulğan barlıq kitap-yazmalarnı da alıp kitkännär – tikşerergä, dip. Qayberläre qalğan da: Säyfi Sarainıñ “Gölstan bit törki” kitabı häm Çenäkäy şiğırläre. Şiğri yullar şikländermägänder inde. “Tieşle cirdä” soraw aluğa duçar itelgän yeget äytüençä, soraw aluçılar üzläre dä “vaxxabizm” digän töşençäneñ närsä ikänen belmilär. Ä anıñ da bu töşençä turında anıq cawap birä almawına ışanmıylar ikän. Şulay da soraw qala: närsä soñ ul vaxxabizm? Kem soñ ul Ben Laden? Qarañğı bülmädä qara mäçene ezläp tabu qıyın, dilär. Mäçe anda bulmasa – bigräk tä. Şuña da karamastan – ezlilär, tabarğa tırışalar, İslam dinen pıçratu omtılışı däwam itä. “S pristrastiem” soraw aluğa duçar bulğan yeget fikerençä, “Alla bar, ul ber genä, barısın da kürä, barısın da belä, barısın da üz urınına quyar äle”. “Azatlıq” radiosı, Ayrat İbrahim, Sember.

XS
SM
MD
LG