Accessibility links

дүшәмбе, 5 декабрь 2016, Казан вакыты 17:48

Amerikan demokratlarınıñ İowa sınawları: ömetle nämzätlär älegä artta bara


Amerika Quşma Ştatlarındağı bıyılğı prezident saylawlarına äzerlek yözennän demokratlarnıñ İowa ştatında uzğan berençel köç sınawlarında senator John Kerry ciñep çıqtı, xörmätle tıñlawçılar. Şulay itep, közen xäzerge respublikan prezidentına qarşı köräş alıp baraçaq demokrat nämzätne açıqlaw eşe başlandı.

Vietnam suğışında qatnaşqan häm xäzerge waqıtta senat äğzası bulıp torğan John Kerry demokratlarnıñ İowa sınawında tawışlarnıñ 37 protsentın qazandı. Anıñ artınnan 32 protsent belän ikençe ber demokrat senator John Edwards kilä. Ä menä älegä qädär demokratlardan töp nämzät bulaçaq dip farazlanğan Howard Dean isä 18 protsent qına yaqlaw qazandı. Ciñüçe danı nurlarında bu yulı Kerry qoyındı.

Audio, John Kerry

"Bez arttan ğına kildek häm bez köräşergä dip kildek" di senator John Kerry, häm "Aq yortta oyalağannarğa min şunı äyter idem - bez kiläbez, sez kitäsez, şunı qarağız, kitkändä işeklär ällä niçek bärmäsen üzegezgä!" dip kisätä xäzerge respublikan prezidentın anıñ ixtimal demokrat köndäşe. Läkin bu qorı süzlär genä dä bulıp qala ala. İowadağı ciñü Kerrygä, demokratlarnıñ töp häm berdänber nämzätne atıyaçaq soñğı qorıltayındağı 2 meñ tawışnıñ 20-sen genä birä. İowadağı sınaw şul yağı belän genä ähämiatle - alar prezident bulu däğwäsen beldergän berniçä nämzättän iñ layıqlısın saylaw eşen başlap cibärä. Tağın ber atnadan soñ demokratlarnıñ berençel saylawları New Hampshire ştatında uzaçaq häm İowadağı ciñü anıñ näticälärenä küpmeder tä''sir yasıy ala. Älegä qädär John Kerry New Hampshiredä, töp favorit Dean häm ikençe ber ömetle nämzät, elekke general Wesley Clarktan şaqtıy qalışa. İowa sınawı demokratlarnıñ tağın ber kürenekle ähele, alarnıñ wäkillär palatasındağı citäkçese Richard Gephardt öçen dä küñelsez näticä alıp kilde. Çığışı belän kürşedäge Missouri ştatınnan buluğa qaramastan ul İowada dürtençe genä urınnı aldı. Gärçä prezidentlıqqa äle 1988-dä ük çığıp qarağan Gephardt ul çaqta näq menä İowa sınawında ciñgän ide. Ul yaqtaşlarınıñ yaqlawına bu yulı da ömetlände, läkin uñışqa ireşä almadı. Şuña da Richard Gephardtqa ğomumi süzlärdän torğan möräcäğät yasarğa ğına qaldı.

Audio, Richard Gephardt

"Tormış däwam itä, çönki bu kampaniä berqayçan da ber miña ğına bäyle bulmadı. Ul barıbızğa da bäyle ide. Bu kiläçägebez, balalarıbız häm Amerikanıñ aldağı könnärenä bäylängän ide" dip belderä Richard Gephardt. Añardan da bigräk İowa sınawı Howard Dean öçen eç poşırğıç ber närsä buldı. Ul biredä üzeneñ uñışlı kampaniäsen başlap cibärergä cıyınğan ide. Läkin ul küñel töşenkelege kiçermi kebek. Üz köräşen kisken räweştä Bush säyäsäten, anıñ Ğiraq suğışın tänqitläwgä qorğan Dean...

Audio, Howard Dean

"Bez yarıştan waz kiçmibez, xäzer dä, kiläçäktä dä. Bez ilebezne ğadi amerikannarğa kire qaytarırğa telibez" di demokratlarnıñ älegä töp prezident nämzäte sanalğan Howard Dean. Häm üzeneñ, Aq yortnı kire demokratlar qulına alu öçen Waşingtonğa baraçağın iğlan itä.

Audio, Howard Dean

Kiläse atnada berençel saylawlar New Hampshiredä uzğaç, fivralneñ 3-endä alar beryulı 6 könyaq ştatında ütäçäk. Ä anda inde çığışı belän könyaqtan bulğan Edwards häm Clarknı yaqlaw bik yuğarı.

Kärim Kamal, Praga
XS
SM
MD
LG