Bilgele bulğança, Tatar yäşläre Şurası III nçe kongress aldınnan, tögälräk äytsäk 2002nçe yılnıñ iyül azağında oyışqan ide. Şurağa Räsäyneñ törle töbäklärendäge tatar yäşläre oyışmaları citäkçeläre häm Qazannan berniçä wäkil kerde. Alar isä ozaq III Bötendönya tatar kongressında qatnaşu bäxetenä dä ireşte. Ni qızğanıç kongresstan soñ Şuranıñ eşe sülpänäyde. Yäş millättäşlärebez bergäläp bıyıl cäy könne genä oçraşu bäxetenä ireşte. “Boris Polevoy” teploxodında uzğan Tatar yäşläre könnärendä alar qabattan üzlären borçığan mäs'älälär buyınça fiker alıştılar. Häm bu söyläşülärdä yänädän tatar yäşläre kongressın uzdıru mä’säläse qalqıp çıqtı. Ägär un yıldan artıq ütkärelep kilüçe tatar yäşläre könnären Tatarstannıñ Yäşlär eşläre häm sport ministrlığınıñ “İdel” üzäge oyıştırsa, yäşlär kongressın isä Bötendönya tatar kongressı üz qanatı astına almaqçı bula kebek. Nik digändä, küptän tügel genä anıñ cirlegendä Tatar yäşläre assotsiatsiäse buldırıldı. Häm kongress räise Rinat Zakirov yäşlär belän eşläwne kiläçäktä canlandırabız dide. Läkin Assotsiatsiägä kongress urın wäğdä itsä dä, wäğdäsen älegä ütägäne yuq. Tağın şunısın äytep ütü kiräk, kongressqa yäşlär belän eşlärgä yaña keşeneñ alınuı da assotsiatsiä wäkillären beraz aptıraşqa qaldırdı. Çönki yaña xezmätkär küp närsädän mäğlüm tügel. “Ägär bez aña yärdäm itmäsäk ul berüze genä bernärsä dä oyıştıra almayaçaq”, - di assotsiatsiä yäşläre. Şulay itep Bötendönya tatar yäşläre kongressın oyıştıruda härkemneñ xuca bulası kilä. Härkem yurğannı üz yağına tarta. İnde alda äytep uzğanımça, sişämbe könne ütkän söyläşüdä 11-14nçe fevral'dä Qazanda oyıştırılaçaq Koordinatsion Şuranıñ kön tärtibendä qaralaçaq mäs'älälär, çaqırılaçaq keşelär isemlege tikşerelde. Şura utırışına Räsäyneñ 20 töbägennän wäkillär kiler dip farazlana. Bu könnärdä alarğa çaqırular cibäreläçäk. Tikşereläçäk mäs’älälärgä kilgändä alar törle-törle – yäşlär öçen mäğlümatı gomumfederal' internet biten açu, tatar yäşläre tormışı belän tanışu maqsatınnan millättäşlärebez küpläp yäşägän töbäklärdä bulu, milli-mädäni moxtäriätkä yäşlär wäkilen kertü, Tatarstan vuzlarında tatar oyışmaları öçen wäkillär äzerläw häm başqalar. Qısqası, ägär täqdimnäregez bulsa sez dä kongressqa citkerä alasız. Bu könnärdä oyıştıru komitetına Çallınıñ “Mizgel” klubınnan täqdimnär kilgän. Alar ber punkt bularaq tatar yäşläre belän bäyle barlıq mäs’älälärne öyränä, analizlıy häm tieşle metodik qullanmalarnı, plan-çaralarnı eşli alırlıq, tatar yäşläre belän eşläwçe oyışmalar eşçänlegen koordinatsiäli torğan metodik üzäk buldırırğa täqdim itälär. Tağın şunı bilgeläp uzarğa kiräk, bu şimbädä Mäskäwdäge tatar yäşläre dä Koordinatsion Şura utırışların uzdırırğa cıyına. Möğayın utırıştan soñ alardan da täqdimnär bulmıy qalmas.
Koordinatsion Şura programmasına kilgändä, Tatarstannıñ däwlät wäkilläre belän oçraşular qaralğan. Şulay uq Mäskäwdän qaytıp citsälär, yäşlär Räsäyneñ Däwlät Dumasına kergän äle berniçä ay ğına Yäşlär eşläre häm sport ministrı urınbasarı wazifasın bilägän İrek Ğilmetdinov häm “Molodej' Tatarstana” gäcite baş möxärrire bulğan Änbär Karmiev belän oçraşu bäxetenä dä ireşäçäk. Monnan tış ministrlıqlarda bulu, tügäräk östäl uzdıru farazlana.
Landış Xarrasova.
