Çärşämbe 21nçe ğinwar könne çıqqan gäzitlärdä “Telefonik –Dakar” xalıqara ralliendä zur ciñü ayulağan, böten dönyağa tanılğan “Kamaz–master” komandası turında yazalar. Bu xaqtağı reportaj “Alarnı dönya tanıdı” digän baş astında Watanım Tatarstan gäziteneñ berençe bitendä basılğan.
Şul uq gäzittä Äxät Safiullinnıñ “Ni öçen Gitler Devyatayevnı şäxsi doşmanı dip atağan?” digän mäqäläse dönya kürgän. Şul uq Devyatayevnı Sergey Korolev Sovetlar Soyuzı geroe isemenä täqdim itkän. Bu yazmada oçuçı Mixail Devyataev batırlığı turında söylänä.
Gäzitneñ 3nçe bitendä “İ tuğan tel, i matur tel” rubrikasında Roza Räxmätullinanıñ “Min po-russki znaeş'” dip atalğan mäqäläsendä bik aktual' sorawlar kütärä. Ana tele däwlät tele bulsın öçen barısı da eşlänäme, bu yünäleştä çit illärdäge millättäşlärdän ürnäk alırğa kiräk tügelme? – dip yaza ul.
Şähri Qazan gäzitendä Liliä Xämidullina “Zamannan qalışmasqa omtılış” isemle mäqäläsendä “Kazgorelektrotrans” munitsipal' unitar predpriätiese general' direktorı Äsfan Galävov belän äñgämä qorğan. Anda ber ayağı belän bankrotlıq çigenä basqan şirkätne saqlap qalğan Äsfan Galävov uñay näticägä kitergän eş çaraları turında söyli.
Şähri Qazannıñ ikençe bitendä Landış Fäyzullinanıñ “Kitap – ğilem çişmäse” mäqäläse urın alğan. Anda äytelgänçä, tatar balalarınıñ kübese tuğan teldä yazılğan kitaplarnı uqımağanğa, alarnıñ söyläm, fikerläw säläte tübänäyä, süz baylığı yarlılana. Şuşı wäzğiättän çığu öçen Mäğärif näşriäte “Mäktäp kitapxanäse” seriäsendä 25 tomlı kitaplar bastırıp çıqqan. Bu kitaplarda tatar xalqınıñ yözek qaşı bulğan kürenekle yazuçılarnıñ äsärläre tuplanğan.
Rus telendä çığuçı oppozitsion gäzitlärdä bu yulı şaqqatırğıç xäbärlär kürenmi. Alarda, mäsälän Şäymiev belän Putin arasındağı reyting ayırması 35 pozitsiä täşkil itü turında, ä alar arasında Vladimir Jirinovskiy, Grigoriy Yavlinski, Boris Nemsov, Valentina Matvienko toru kebek mäğlümatlar basılğan.
