Blairnıñ süzçese saylawlarnı iyül ayına qädär ütkärü awır bulaçaq dip belderde.
Quşma Ştatlar 30-nçı iyüngä Ğiraqta xakimiätne Ğiraqnıñ küçeş çorı xökümätenä tapşırırğa teli.
Ğiraqta küpçelekne täşkil itüçe şiğilarnıñ ruxi citäkçese Ayatulla Ali äs-Sistani isä saylawlarnı aña qädär ük ütkärergä çaqıra.
Amerikan planı isä xakimiätne turıdan-turı saylanğannarğa tügel, ä töbäklärdäge cirle citäkçelär saylağan cıyınğa tapşırunı küzdä tota.
Uzğan ber täwlek eçendä Ğiraqta berniçä höcüm buldı. Kiçä Falluca şähäre yanında ğiraqlı xatın qızlarnı AQŞ xärbi bazasına eşkä alıp baruçı maşinağa höcüm näticäsendä 4 xatın-qız hälak buldı, 5 xatın-qız häm maşina yörtüçe yaralandı.
Bügen Fallucada politsiä kizüenä höcüm näticäsendä ğiraqlı 2 politsiä xezmätkäre häm ber sivil keşe hälak buldı tağın 3 keşe yaralandı. Uzğan töndä Baquba şähärendä raketa yäki minaatqıç höcüme näticäsendä 2 amerikan xärbie hälak buldı, beräw qatı yaralandı.
