Accessibility links

якшәмбе, 4 декабрь 2016, Казан вакыты 11:16

<br>Tatarstandağı tormış Yevropa-Rusiä mönäsäbätlärendä çağıla


Sişämbe könne mäğlümat çaraları Qazan Kremlendä Mintimer Şäymiev Almaniä Bundestagınıñ Xalıqara eşlär komitetı räise Fol'ker Ryuenı qabul itte dip xäbär ittelär. Almaniä parlamentı wäkileneñ Tatarstanğa ike könlek vizitı Rusiädä 2004nçe yılnı “Rusiä Federatsiäsendä alman mädäniäte yılı” itep iğlan itü uñayınnan ütkäreläse çaralarğa äzerlänü mäs’älälärenä bağışlanğan. “Tatarstanda Almaniä könnäre” digän çaralar programması fevral' ayında Qazanda da başlanası. Şularnıñ iñ citdie sentäbergä bilgelängän “ Almaniä iqtisatı köne”. Şuña kürä Bundestag komitetı räise Tatarstandağı säyäsi iqtisadıy xäle belän bik nıqlap tanışa. Vizitınıñ berençe könendä çärşämbe könne Fol'ker Ryue äfände bik ozaqlap Däwlät Şurası räise Färit Möxämmätşin belän oçraştı. Säyäsi wäzğiät turında söylägändä Färit Möxämmätşinğa xättä qunaq aldında uzğan Duma saylawlarında “Yedinaya Rossiäneñ” respublikada şulay “qıçqırtıp” ciñgäne öçen ber niqädär cawap totarğa härxäldä täfsille itep añlatırğa turı kilde. Ul monı xalıqnıñ Prezident Vladimir Putin xuplağan partiä öçen tawış birüläre belän añlattı. Ä uñ köçlärneñ ottırışın xalıqnıñ reformalarnı başqa xuplamawları belän tügel, ä uñ firqälärneñ eçke qarşılıqları häm saylaw kompaniäse ütkärüdäge xataları belän añlattı. Almaniä wäkile Tatarstan citäkçelege belän oçraşudan qalğan tä'sirläre belän Mintimer Şäymiev belän oçraşu tämamlanğaç urtaqlaştı. Anıñ fikerençä Tatarstanda säyäsi häm iqtisadıy wäzğiät totrıqlı. Bigräktä keşelär yaxşı. Millät ara häm din ara mönäsäbät küp yıllar totrıqlı saqlana. Tatarstan federalizm prinsiplarında da nıq häm bu mäs'älädä Mäskäwgä qarağanda könbatışqa yaqınraq tora. Fol'ker Ryue Tatarstandağı xällär Auropa-Rusiä mönäsäbätläre öçen möxim - dip yomğaqladı.

XS
SM
MD
LG