Accessibility links

Кайнар хәбәр

<p></p>2003nçe yılda cinayätlär sanı 2,1 %-qa kimegän




23nçe ğinwar könne Eçke eçlär ministrlığı üzeneñ yıllıq utırışın uzdırdı. Anda 2003nçe yıl eçendä respublikada cinayätçelek ölkäsendäge xäl totrıqlı bulıp qalğan, ä ayırım rayonnarda zakon bozular sanı kimegän, dip iğlan itelde. Ä ayıruça awır cinayätlär sanı, 2002nçe yıl belän çağıştırğanda 23% azraq terkälgän. Respublika xakimiätläre tarafınnan tärtip saqlaw oyışmalarınıñ eşe qänäğätlänerlek dip tabılsa da, tänqit beldererlek eşlär dä citärlek. Üz eşeñä salqın qaraw, ayırım oyışmalarnıñ häm keşelärneñ qanunsız eşlärenä küz yomu kebek oçraqlar Tatarstan militsiäsendä yuq tügel. Bu xaqta eçke eşlär ministrlığı citäkçelege, tieşençä eşlämägän xezmätkärlären bastırıp, cıyılış barışında sorawlar birep, tänqit belderde.



Läkin şul uq waqıtta, eşlären namuslı başqarğan xezmätkärlär dä bar. Alarğa maqtaw käğäzläre häm medal’lär tapşırdılar. Eçke eşlär ministrı Äsxät Säfärov üzeneñ çığışında bilgeläp ütkänçä, respublikada cinayätçelek belän köräşneñ böten yünäleşlärendä dä, qanun bozu oçraqlarınıñ kimüe küzätelä. Şäxeskä qarata qılınğan cinayätlär belän dä, narkotiklarnıñ qanunsız äyläneşe belän köräş tä uñışlı bara. Xalıq ta militsiäneñ eşen uñay yaqtan bäyäli ikän. Äsxät Säfärov, Ministrlar Kabinetı ütkärgän soraştıru näticäläre belän tanıştırdı. Respublika xalqınıñ 55% «Bezneñ militsiä - bezne saqlıy» digän, bilgele ğibärägä ışana.



Yıllıq utırışta çığış yasağan, xökümät räise Röstäm Miñnexanov, respublika xakimiätläreneñ militsiä aldına quyğan burıçlar turında söyläde. Mäsälän, ul Eçke eşlär ministrlığı töp iğtibarnı oyışqan cinayätçelek belän köräşkä, narkotiklar qullanunı kimetügä häm, iñ möhime, ğadi keşelärneñ iminlegen tä’min itügä yünältergä kiñäş itte.

Soñınnan, jurnalistlar aldında çığış yasağanda, Röstäm Miñnexanov militsiä xezmätkärläreneñ sotsial xälen yaxşırtuğa da respublika xakimiätläre iğtibar biräçäk, dip wäğdä itte. Mäsälän, Çeçnädä xezmät itä torğan militsiä xezmätkärlärenä respublika byudjetınnan östämä açqa tülänä inde. Şimbä könne tağın 34 militsiä xezmätkäreneñ Gudermes şähärenä kitüe kötelä. Alar moña qädär dä Çeçnädä xezmät itkän häm şuña kürä andağı xällär belän tanış. Xäzerge waqıtta 100 artıq Tatarstan militsiä xezmätkäre Gudermesta tärtip saqlıy. Bu yılda Çeçnädä xezmät itkän militsiä xezmätkäre arasında ülem-kitemnär yuq, barısı da isän-saw äylänep qaytqan.

Bikä Timerova.

XS
SM
MD
LG