Accessibility links

Кайнар хәбәр

Xakimiät firqäsendä deputat bulırğa teläwçelär 90 keşedän kübräk bulıp çıqtı




Xakimiät firqäse isemleklären raslağaç, saylaw aldınnan töp köräş «Berdäm Rusiä» firqäse nämzätläre qatnaşmağan 8 okrugta ğına bulır dip, uylağannar ide. Ämma alay kilep çıqmadı. Xakimiät firqäsendä dä, deputat bulırğa teläweçlär räsmi isemlektäge 90 keşedän kübräk bulıp çıqtı. Mäsälän, Qazandağı İbrahimov okrugında nämzätlärneñ 5-se «Berdäm Rusiä» firqäsennän. Ütkän atnada ğarizaların kire alğan keşelär dä, şul uq firqädän buldı. Läkin alar bu adımğa saylawlarda qatnaşmas öçen tügel, ä yañadan Üzäk saylaw komissiäsenä inde räsmi räweştä «Berdäm Rusiä» firqäseneñ nämzätläre bularaq möräcäğät itü öçen bara. Bu oçraqta süz Nikolay Kolesov häm Cämil Yagudin turında bara. Yamaşev okrugında da xakimiät firqäse äğzäläre ber berse belän köräşergä uylap tora. Gvardeyskiy okrugta da, şundıy uq xäl. Komsomolskiy, Çallı häm Melekäs saylaw okruglarında da wazğiät kierenke. Alarda yä zur citäkçelär, yä «Berdäm Rusiä» firqäse belän şulay uq xakimiätneke dip sanalğan «Yaña ğasır» xäräkäte wäkilläre ber uq saylawçılarğa wäğdälär öläşep yöriäçäk.



Şulay itep, tawış birüçelärgä bersennän berse layıqlı keşelärdän saylarğa turı kiläçäk. Xakimiät firqäsennän 3-4 nämzät bulsa, kommunistlar häm Uñ köçlärdän, tağın Liberal-demokratlar häm üz üzen kürsätkän nämzätlär dä saylaw isemleklärendä bulırğa oşıy.



Üzäk saylaw komissiäse xäbär itkänçä, Kommunistlar firqäsennän 41 keşe isemlek belän bara häm tağın 27se –ber mandatlı okruglarda saylanırğa teli. Firqä isemlegendä berençe 3 urında Aleksandr Saliy, Robert Sadıykov häm Näsimä Stolyarovanıñ isemnären kürep bula.

Nämzätlär sanı belän, kommunistlar, xakimiät firqäsennän genä qalışa. Saylawlarda Karl Marks täğlimätın yaqlawçılardan barlığı 67 keşe köç sınarğa uylıy.



Öçençe urında – «Tormış» firqäse. Bu firqä 45 keşene nämzät itep kürsätkän. Jirinovskiy firqäseneñ tarafdarları da şaqtıy. Firqäneñ isemlegendä 12 keşe kürsätelgän. Ä menä 1 mandatlı okruglarda LDPRdan 26 keşe saylanırğa teläk beldergän. Jirinovskiy firqäseneñ Tatarstan bülege barlığı 38 keşesen deputat itep kürergä teli.



SPS firqälärneñ iñ tıynağı bulıp çıqtı. Firqä isemlegenä barlığı 12 keşe täqdim itelä. Berençe 3 urında : eşmäkär Aleksandr Tarkayev, yäş ğälimnär şurası räise Sergey Yuşko häm eşmäkär Ayrat Äxmädiev. Häm barı 2 genä keşe 1 mandatlı okruglarda saylawçıqlarnıñ küñelen yawlarğa batırçılıq itkän.



Xäzerge waqıtta 50 saylaw okrugınnan barlığı 250 nämzät kürsätelgän.

Bikä Timerova.

XS
SM
MD
LG