Accessibility links

шимбә, 10 декабрь 2016, Казан вакыты 10:04

Gäzit bitlärendä - xalqıbız suräte


15-19-ğinwarda ber törkem jurnalistlar hem ğalimnär Törkiägä barıp qaytqannar. Miläwşä Aytuğanova, Damir İsxakov, Räşit Äxmätov häm başqalar belän bergä säfärgä barğan Räşit Minhac Watanım Tatarstan gäzitendä “Törkiägä barıp ğibrät al” digän yılyazma bastırğan. Bu säyäxät waqıtında törek litseyları niçek, nindi maqsat belän kem tarafınnan oyıştırıluı turında yaxşıraq añlarğa mömkinlek tuğan. Ber dä zıyanlı eş tügel ikän ul litseylar, gärçä qayçağında alarnı Rusiädän qısırıqlap çığarsalar da. Tatarstan delegatsiäse İstanbuldağı Fatıyx universitetında, “Dialog-Avraziä” jurnalı, “Zaman” gäcite redaksiälärendä, “Saman yulı” telekompaniäsendä bulıp, barısın da täfsilläp öyrängän, ğibrät alğan.

Tatarstan yäşläreneñ şimbä sanında Mintimer Şäymievnıñ “Xalqıbız süräle” rubrikasına möräcäğäte basılğan. Bu rubrikada ğädättä teläsä nindi ğadi keşe prezidentqa xat häm üz räsemen bastıra, üzeneñ fiker täqdimnären äytä. Mintimer Şäymievnıñ redaksiägä cawap yazğan. Närsä yaza soñ monda prezident? Sitata: “Üzegezneñ xatlarığızda sez miña bik yaqın itep, cılı häm dustanä möräcäğät itäsez, isemdä qalğan menä: Mintimer ulım, enem, ağa, abıy, äfände, babay, yäşti, dusqayım... Aqsaqal, ilbaşı, soltan, padişah, xätta höcümçe-bombardir dip atawçılar da bar». Prezident xatlarda quyılğan mäs'älälär turında yaza. «Sezneñ xatlarnı uqığanda miña hämmägez belän qara-qarşı söyläşep utıram sıman toyıldı», dip cawap birä prezident.

Tatarstan yäşläreneñ bu sanında şulay uq İskändär Siracinıñ «Xıyaldağı milli teatr» mäqäläse bar. Ul Bua tatar teatrınıñ professional' däräcädä çığış yasawın bilgeli.

“Şähri Qazan”da Ence Yaqupovanıñ “Qullarınnan göllär tama” isemle mäqäläsendä bik osta itep itek oltanı saluçı Zıyatdinov İbrahim turında yazıla, itekläre tuzsa da İbrahim ağanıñ oltannarı şul kileş matur saqlana. Ayaq kiemnärennän tış ul şulay uq osta ipi sawıtları, orçıqlar, narda uyınnarı, xätta öç qatlı şkatulkalar yasarğa da bik osta keşe ikän.

Bezneñ gäcitneñ soñğı sanında “Yaña ğasır” telekanalınıñ“Äybät ğäybät” tapşıruı turında anıñ alıp baruçısı Läysirä Fazlıyeva, rejisserı Rifat Yusupov belän äñgämä basılğan.

Cırçı Ğabdelfät Safin oyıştırğan Aqçarlaq gäzitendä Aydar Ğälimov belän äñgämä ütkärelgän: Aydar üzeneñ ber cawabında “Antipoklonniklarım küp”- dip äytkän. Şul uq gäzittä Zöhrä Säxäbieva turında da xäbär bar. “Çınlap ta kiäwgä çıqtıñmı ällä?”-dip sorağaç, Zöhrä xanım “Yuq, min Xäydärne xäterläp yäşim” dip cawaplağan. Ul Xäydär Bigiçevnıñ lazer tälinkäse çığaru östendä eşli ikän. “Aqçarlaq” gäziteneñ bu sanında “Yaña ğasır”radiosı jurnalistlar Timur Urazbaxtin, Gölnaz häm İl'nur Fäyzraxmanovlar, Dilbär Fäezova turında qızıqlı yazmalar bar.

Al'bina Zäynulla. Qazan.

XS
SM
MD
LG