Accessibility links

сишәмбе, 6 декабрь 2016, Казан вакыты 03:58

“Tatarstan xalıq rässamı”- başqort yegete - Räşit İmaşev


Qazannıñ Ostrovskiy uramında “Duslıq yortı” bar. Anda azerbaycan, ärmän , gruzin, üzbäk, yähüd häm başqa milli cämğiätlär urnaşqan. Başqort cämğiäte dä şunda cıyıla.

Bu tapşıruıbızda başqort cämğiäteneñ kürenekle wäkile rässam Räşit İmaşev belän tanıştırabız.Bu könnärdä Tatarstan Prezidentı Mintimer Şäymiev Ukazı belän Räşit İmaşevqa “Tatarstannıñ xalıq rässamı” digän isem birelde.

Ul yazğan tatar-başqort awılın xäterlätkän “İrtä” isemle kartinası Mäskäwneñ Tret'yakov galereyasında, ä soldat xezmätendäge avtorportretı “Xat ” dip isemlängän kartinası S-Peterburgnıñ Rus muzeyında elenep tora.

Sez Tatarstannıñ xalıq rässamı Räşit İmaşev belän äñgämä tıñlıysız.

Räşit İmaşev Qazandağı ostaxanäsendä inde 30 yıl buyı icat itä. Cämäğät eşenä dä ölgerä.

Qazan rässamğa ilham birgän. Ul tuğan yağın onıtmıy. Yaqtaşları Räşit İmaşevqa Bişbuläk rayonı Ayıt awılında tuğan şağir Fatıx Kärim isemendäge büläk birü turında qarar çığardı.

Ayıttan yaqınla ğına urnaşqan Aznay awılında tuğan Räşit İmaşev danlıqlı yaqtaşları, qärdäşläre belän ğorurlana. Anıñ ätiseneñ bertuğan enese Bulat İmaşev talantlı başqort rejisserı bularaq tarixqa kergän, xäzer Aznayda anıñ xörmätenä muzey açılğan.

Räşit İmaşevnıñ ulı Rawil balaçaqtan teatr sänğäten yaratqan, Därwişlär bistäsendäge Säyetğäliev mädäniät yortına tügäräkkä yöregän. MäskäwdäTeatr institutın tämamlağannan soñ, Ravil' Räşit ulı Kanadağa barıp çığa, xäzer şunda Vankuver şähärendä yäşi, Amerikanıñ ataqlı Gollivud studiäsendä eşli, anıñ “Gugo” digän fil'mda uynağanı bar, ul “Sekretnıye materialı” digän populyar serialda qatnaşa.

Räşit ağaynıñ qızı Nailä tarix fännäre kandidatı, Tatar ensiklopediäsendä bülek mödire bulıp eşli.

Räşit İmaşevnıñ tormış iptäşe Tänzilä xanım Tatarstannıñ Teläçe rayonınnan. Ul ozaq yıllar buyı zavodta, partiä orğannarında eşlägän. Soñğı yıllarda ul Qazan şähäreneñ xökümät uçrejdenieläre profsoyuz komitetın citäkli.

Bu tapşıruıbızda Sezne Tatarstannıñ, Başqortstannıñ xalıq rässamı Räşit İmaşev belän tanıştırdıq. Tatarstan mädäniätenä zur öleş kertkän şäxeslär – Abrek Abzgil'din, Lima Kustabaeva, Räis Yuldaşbaev, Gölsem İsänğolova, Firdäwes Bäşirova - üzläreneñ yazmış suqmağın Qazanğa kilep tapqannar. Alar belän ike tuğandaş xalıq, ike respublika da ğorurlanırğa xaqlı.

Azatlıq radiosı Mälikä Basır, Qazan.

XS
SM
MD
LG