Accessibility links

җомга, 9 декабрь 2016, Казан вакыты 22:24

Ğiraqta mäğlümat çaraları xezmätkärläreneñ iminlege: alarğa qorallı saqçılar quyu urınlımı?


Ğiraqtağı amerikan ğäskärläre soñğı aralarda üzlärenä yasalğan höcümnärneñ kimüe xaqında beldersä dä, köndälek köç qullanu näticäsendä anda qorbannar sanı arta bara. Sişämbe kön yasalğan höcüm näticäsendä Ğiraq başqalası tirälärendä CNN telekanalı öçen eşlägän ike keşe hälak buldı. Bu yänä ildäge iminlekneñ nindi xäldä buluı xaqındağı bäxäslärne arttıra.

Ğiraqtağı Könbatış xärbiläreneñ iminlege, alarnıñ üz süzlärenä qarağanda, soñğı atnalarda şaqtıy yaxşırsa da, ğadi xalıq häm Ğiraqta eşlägän çit il keşeläre turında monı äytep bulmıy. Çärşämbe könne dä alar yäşägän ber qunaqxanägä yaña höcüm yasaldı, ä sişämbedä başqala Bagdadqa qaytu yulında maşinalarına ut açılu näticäsendä CNN telekanalı öçen eşlägän ike ğiraqlı, ber tärcemäçe häm ber kameraçı hälak buldı. Ğiraqtağı çit il xäbärçeläre il buylap ğädättä üzläre genä, xärbi saqsız yöri. CNN-nıñ Bagdadta barı tik iminlek kiñäşçese genä bar, häm höcüm waqıtında anıñ yardäme bik urınlı bulğan dip xäbär itelä. CNN keşeläre ilneñ könyağınnan Bagdadqa ike maşina belän qaytqan, höcümdä hälak bulğan ğiraqlılar şularnıñ ikençesendä ide dielä. Yulda alarnı arttan ikençe ber maşina uza başlıy häm şunnan alarğa ut açıla. Höcüm yasawçılar alda barğan maşinağa da ata, ämma andağı iminlek kiñäşçese cawap utı qaytarğaç alar tiz genä urınnan yuğalırğa mäcbür qala. CNN-nıñ xäbärçese Michael Holmesqa berni dä bulmıy. Anıñ süzlärenä qarağanda, älege höcüm aldan planlaştırılğanğa oşap tora, ä CNN-nıñ Londondağı wäkile ğomumän, bu kileşenep eşlängän terror höcüme ide dip belderä. Şuşı waqiğä yänä Ğiraqtağı iminlekneñ torışı turında yaña sorawlar kütärä. Mäğlümat çaraları wäkilläre, törle humanitar eşlär belän şöğellänüçe çit il keşeläre xäzer qorallı saqçılar yallarğa tieş bulamı? Xäbärçelär öçen bu şaqtıy bäxäsle häm qarşılıqlı mäs''älä. Mäğlümat çarasına eşläwne açıqtan-açıq PRESS digän yazu belän kürsätkän maşinağa qorallı keşene utırtu xäbärçelärgä mönäsäbätne boza, alarnı neytral'' tügel, ä nindider ber tarafnı aluçı itep kürsätä dip uylawçılar bar. CNN älege bäxäsle mäs''äläne, üz xezmätkärlären PRESS digän yazu quyılmağan, läkin qorallı saqçısı bulğan maşinağa utırtıp xäl itkän. Läkin sişämbe höcüme şunı kürsätä - bu da xäbärçelärne törle ğädättän tış xällärdän qotqara almıy. Suğış häm solıx çorında yazu İnstututınıñ Bagdadtağı wäkile Hiwa Osman süzlärenä qarağanda, älege oyışma xezmätkärläre Bagdadta qorallı saqçılarsız ğına yöri. Londonda urnaşqan şuşı institut xäzerge waqıtta Ğiraq başqalasında cirle xäbärçelär äzerläw eşen alıp bara. Osman, bezneñ xezmätkärlär iğtibarnı cälep itmi genä iske maşinalarda yörergä tırışa, ä qayber mäğlümat çaraları wäkilläre isä zatlı, zamança maşinalarnı xup kürä dip belderä.

Audio, Hiwa Osman

"Alar, yäğni qayber xäbärçelär, yaltırawıq, qupşı maşinalarda yöri häm ul maşinalar çınlap torıp, aqçanıñ taşıp çığuın qıçqırıp tora. Höcümnärneñ küpçelegen talawlar täşkil itä, alar atında säyäsi säbäplär yuq" di Bagdadtağı Hiwa Osman. Ämma ul berük waqıtta, soñğı aralarda talawlar sanı şaqtıy kimede, ä menä säyäsi höcümnär öçen cirlek äle dä bar häm elekke xakimiat wäkilläre eşsez, aqçasız ğiraqlılarnı çit il keşelärenä höcüm yasaw öçen bik ciñel genä yallıy ala dip belderä.

Kärim Kamal, Praga
XS
SM
MD
LG