Accessibility links

Кайнар хәбәр

Eçke eşlär ministrlığı Qazanda totıq alınu turındağı xäbärne inqär itä


«Qazanda totıqlarnı qulğa alğannar», digän xäbärne «Yaña ğasır» televideniese tarattı. Ber ir-at, totıqlarnı alıp, fatir taläp itä, dielde älege xäbärdä. «Azatlıq» radiosı xäbärçese bu mäğlümatnıñ döreslegen tikşerü öçen, Eçke eşlär ministrlığına şaltırattı. Bu oyışmanıñ mäğlümat üzäge dä, Televidenie xäbär itkänçe, bu xaqta belmägän bulğan. Läkin, soñınnan «Borçılmağız, bu militsiä xezmätkärläreneñ öyränüläre genä buldı», dip xäbär itte Eçke eçlär ministrlığınıñ matbuğat üzäge. Bu yäşeren operatsiä bulğan, anıñ öyränü ikänen militsiä xezmätkärläreneñ dä barısı da belmägän.



Öyränü planına qarağanda, cinayätçe, Lenin muzeyında eşläwçe keşelärne totıq itep ala. Ul üzen häm binanı şartlatu belän yanıy, anıñ üze belän şartlatqıç äyberläre dä bula ikän. Cinayätçe şähär başlığı belän oçraşunı taläp itä, häm, televidenie xäbärenä qarağanda, äle fatır birü taläben dä quyğan bulğan.



Şuşı operatsiäne ütkärep, Eçke eşlär ministrlığı, üz xezmätkärlären mondıy xällärdä üzen niçek totarğa kirägen öyrätergä teli, dip xäbär ittelär matbuğat üzägendä. Mäsälän, militsiä xezmätkärläre, totıq alınu xäbären işetkäç uq, bik tiz arada saqlıq çaraların kürergä häm cinayätçe belän söyläşülär başlarğa tieş bula.

Eçke eşlär ministrlığı mäğlümatlarına qarağanda, mondıy öyränülär yış ütä. Alar yäşeren operatsiä räweşendä bula, şuña, kiñ cämäğätçelek bu xaqta belmi qala.



Tapşıruıbıznı efir öçen äzerlägän minutlarğa, bu waqiğa turında Eçke eşlär ministrlığı birgän añlatmadan arı räsmi mäğlümatnı tabıp bulmadı. Başqa oyışmalar bu xaqta ber süz dä äytmi. Waqiğanıñ barışın «Azatlıq» radiosı xäbärçese küzätep barır. Tulıraq mäğlümatnı aldağı çaqırılışlarıbızda birerbez.

Bikä Timerova.

XS
SM
MD
LG