28nçe ğinwar könne respublikanıñ Xezmät häm mäşğüllek ministrlığı üzeneñ yıllıq kollegiäsendä 2003nçe yıldağı eşçänlegenä yomğaq yasadı. 27nçe ğinwarda Tatarstan xökümätendä respublika şirkätlärendä xezmät xaqların tüläw buyınça burıçlar xaqında söyläştelär. Älege mäs’älälär belän şöğellänüçe komissiä wäkilläre süzlärenä qarağanda, 2004nçe yılda bu ölkädä xällär şaqtıy äybätlängän. 2003nçe yılnıñ başı belän çağıştırğanda xäzer burıçnıñ küläme 962 millionnan 151 millionğa kimegän. Burıçlı predpriätielär sanı da azayğan. Alarnıñ sanı xäzer barı tik 359nı täşkil itä. Şulay uq, älege komissiä eşçänlege näticäsendä xezmät xaqların tülämägän citäkçelärgä qarşı 10 cinayät eşe quzğatılğan, 28 citäkçe eştän alınğan. Rusiä armiäsenä xärbi xezmätkä közge çaqırılışnıñ näticäläre yasaldı. Respublikanıñ xärbi komissariäte wäkilläre süzlärenä qarağanda, xezmät itärgä Tatarstannan bu yulı 4 meñ yarım keşe kitkän. Şul uq waqıtta, ber meñ yarım yäş yeget xärbi xezmättän qaçıp yöri. Ayıruça qaçuçılarnıñ sanı şähärlärdä küp ikän. Yäşlärneñ armiädä xezmät itärgä telämäwe häm aña äzer bulmawda, xärbilär berençe çiratta mäktäpne ğäyeplilär. Xäyer, bügenge Rusiä armiäsendäge problemalarnı xäl itmi torıp, mäktäp kenä, ni genä eşläsä dä, xärbi xezmätneñ abruyın kütärä almas şul. Saylaw aldı yañalıqları. Çärşämbe, 28nçe ğinwar könne, 14nçe martta respublika Däwlät Şurasına uzaçaq saylawlarğa nämzätlärne terkäw tämamlandı. Soñğılardan bulıp älege saylawlarda qatnaşu öçen tağın ber säyäsi oyışma – Rodina saylaw blogı terkälde. Anıñ isemlegendä 16 keşe bar. Ber mandatlı okruglardan isä Rodina blogınnan nibarı ber genä keşe qatnaşaçaq. Şuşı könnärdä genä Üzäk saylaw komissiäsendä Rusiä töbäkläre firqäseneñ respublika isemlege buyınça da nämzätlär terkälde. Älege firqädän dä isemlektä 16 keşe terkälgän. Xäyer, ber mandatlı okruglarda Rusiä töbäkläre firqäsennän berkem dä çıqmağan. Bu xaqta tulıraq mäğlümatnı bez sezgä kiläse tapşırularıbızda äle citkererbez.
