Accessibility links

Кайнар хәбәр

Qoral belgeçe David Kay belderüençä, suğış aldınnan Ğiraqta KÜQ bulmağan


Saddamnıñ küpläp üterü qoralı (KÜQ) bulğanmı-yuqmı digän çeterekle soraw äle dä iğtibar üzägennän töşmi. Ğiraqta qoral ezlägän törkemneñ elekke citäkçese amerikan belgeçe David Kay, çärşämbedä Senatta xisap totıp, tikşerü näticäläre şunı kürsätä: suğış başlanır aldınnan Ğiraqta zur külämdä tıyılğan qoral bulmağan, digän belderü yasadı. Monıñ näq kiresen täqrarlağan küzläw oyışmaların Kay zäğiflektä ğöyepläde.

Mäglüm ki, räsmi Waşington, Ğiraqta ximik, biologik, xättä atom qoral buluın, anda suğış başlaw öçen töp säbäp itep quydı. Suğış betügä inde 9 ay, ä bu dälillärneñ älegäçä tabılğanı yuq. Ğiraqta qoral ezläw belän şöğellängän törkem citäkçese David Kay çärşämbedä Senatnıñ Xärbi köçlär komitetında xisap tottı. Uzğan comğa wazifasınnan kitkännän soñ, bu anıñ yaña sıyfatta berençe çığışı buldı. Uzeneñ çığışında ul bolay dide:

Audio (David Kay)

"Ğiraqta ximik yä biologik qoral tabu öçen bez küp köç saldıq. Andıy qoralnıñ zur külämdä bulu ixtimalı yuq däräcäsendä."

Bälki, qayçan da bulsa Ğiraqta närsäder tabılır, läkin minem törkem anda berni tapmadı, di Kay:

Audio (David Kay)

"Xäyer, 6 aydan, yä 6 yıldan soñ, sez bit här tikşekne qarap çıqmadığız, qoralnıñ berär cirdä yäşerelgän buluı ixtimalmı, dip sorawçılar bulır. Alarğa ixlas cawap: älbättä ixtimal."

David Kay süzlärençä, Ğiraqta tıyılğan qoralnıñ tabılmawı Amerikanıñ mäglümät tuplawda zäğiflegen açıp saldı. Küzläw oyışmaları bu yağın yaxşırtırğa tieş dide ul:

Audio (David Kay)

"Xatalar çınlap ta bik küp. Xäyer, säbäplär dä bardır. Andıy mäglümät tuplaw awır eş, bigräk tä, yabıq cämğiättä."

David Kay törkem başlığı itep Bush administratsiäse tarafınnan bilgelände. Ul çaqta ul Saddamnıñ küpläp üterü qoralı buluına şiklänmi ide. Bush administratsiäse, Saddam Amerika ğına tügel, bar dönyağa qurqınıç tudıra dip kilde. Säbäben David Kay añlata:

Audio (David Kay)

"Ägär sez soñğı 12-15 yılda Ğiraq turında tuplanğan küzläw mäglümätlären uqıp çıqsağız, Ğiraq dönyağa zur qurqnıç tudıra digän näticädän başqa näticägä kilä almıysız."

Demokrat senatorlar häm başqa tänqitçelärneñ, bälki küzläwçelär bu näticägä administratsiä basımı astında, suğışnı aqlaw öçen kilgänder digän farazın, Kay kire qaqtı. Min xisapnı äzerlägän belgeçlärneñ kübese belän söyläşep çıqtım. Alarnıñ berse dä nindi dä bulsa basım oçrağın telgä almadı, di Ğiraqta qoral ezlägän häm berni taba almağan törkemneñ elekke citäkçese David Kay.

Ali Gilmi, Praga
XS
SM
MD
LG