Accessibility links

якшәмбе, 4 декабрь 2016, Казан вакыты 03:05

Kofi Annan''ğa Saxarov isemendäge büläk tapşırıldı


Bügen Berläşkän Millätlär Oyışması general sekretare Kofi Annan'ğa Yevropa Parlamentınıñ keşe xoquqları ölkäsendäge iñ yuğarı büläge tapşırıldı. Fiker İreklege öçen Saxarov büläge dip isemlängän şuşı büläk Annan'ğa uzğan yılda Bağdadta bomba höcüme waqıtında hälak bulğan Oyışmanıñ wäkile Sergie Vieira de Mello istälege bulraq birelde. Büläkne alğaç yasağan çığışında Oyışmanıñ general sekretare, terrorğa qarşı global suğış keşe xoquqların bozuğa kiterergä tieş tügel, dip belderde. Şulay uq, may ayınıñ berençe könendä Yevropa Berlegenä 10 yaña äğzane qabul itüne xuplap, Kofi Annan, Berlekne kiñäytü – Yevropa tınıçlığınıñ nigeze bulaçaq, dip belderde: "Tınıçlıqqa sez törle yullar belän kildegez, häm bügen Yevropa Berlegenä taba keşe xoquqları häm xalıqara xezmättäşlek nurı qarıy. Bıyılnıñ berençe mayınnan soñ bu nur tağın da yaqtıraq balqıp toraçaq. İnde 25 äğzalek oyışma bulğaç sez Könçığış belän Könbatış arasındağı büleneşne beteräçäksez. Berlekneñ kiñäyüe – Yevropa qitğasında tınıçlıqnıñ nigeze" dip belderde Kofi Annan. Annan şulay uq Yevropa Berlegen açıq häm keşelekle tışqı säyäsät alıp barırğa çaqırdı, möhacirlär häm qaçaqlarnı "qorban täkäsenä" äyländermäskä öndäde.

XS
SM
MD
LG