Accessibility links

сишәмбе, 6 декабрь 2016, Казан вакыты 17:21

Başqortstannıñ yaña xökümäte raslandı


Nihäyät, Başqortstan Republikasınıñ yaña xökümäte dä oyıştırıldı. Prezident Mortaza Räximov üzeneñ 29 ğinwardağı färmannarı belän başqarma xakimit strukturlarındağı üzgäreşlärne rasladı häm yaña ministerlarnı täğäyenläde. Berniçä genä yañalıqnı isäpkä almağanda, Başqortstan Ministerlar qäbinetı zur üzgäreşlärgä duçar itelmäde. Barı tik mäğärif, tözeleş, arxitektur häm transport, şulay uq matbuğat häm kiñküläm mäğlümat çaraları ministerları ğına almaşındı. Äle Mäğärif ministerlığınıñ yaña citäkçeseneñ kem buluı bilgele dä inde. Elekke Gali Möxämmätcanowa urınına bu wazifağa Zöhrä Räxmätullina täğäyenlände. Elegräk bu urınğa Dürtöyle rayonı xakimitı başlığı Rawil Däwlätovnı bilgelärgä ciınalar ikän, digän imeş – mimeşlär dä yörgän ide. Yaña minister Zöhrä xanım Räxmätullina moñarçı Başqortstan däwlät universitetında eşläde, kafedra mödire wazifaların başqardı. Yaña ministernıñ fän doktorı, professor däräcäläre bar. İkençe ber färmanı belän Mortaza Räximov matbuğat ministerı Zöfär Timerbulatovnı wazifasınnan buşattı. Matbuğat ministerlığı älege üzgäreşlärdä üzeneñ yuğarı däräcäsennän qolaq qaqtı. Anıñ ministerlıq däräcäsen beterep, barı tik Başqortstan republigı xökümäte qarşındağı Matbuğat, näşriät häm poligrafi idaräse digän atamada ğına qaldırdılar. Äle bu idaräne kem citäkläyäçäge mäğlüm tügel. Ul xaqta prezidentnıñ färmanı yuq. Matbuğat ministerlığınıñ beterelüe küp kenä gäzitlär, jurnallar häm başqa kiñküläm mäğlümat çaraları citäkçelären poşpmanğa saldı. Alar fikerençä, ministerlıq statusın ğädi ber idarä däräcäsenä genä qaldıru matbuğat basmalarınıñ matdi xälen möşkelländeräçäk. Distä yıllar buyı däwlät finanslawına ğına ışanıp yäşägän basmalar citäkçelären dä añlap bula. Alar üzläre aqça eşlärgä öyränmägän inde. Başqortstan xakimitları respublikada gäzit häm jurnallarnı däwlät finanslawı betereläçäk, dip moñarçı da kisätä kilgän ide. Eşlär äkrenläp şuña bara kebek. Ämma xakimitlar barıber üzläreneñ ruporı bulırğa tieşle berniçä töp basmanı üz aqçasına totaçaq, älbättä. Monısı kön kebek açıq.

Tağın ber färmanı belän Räximov äfände Tözeleş, arxitektur häm transport ministerlığın beterep, anı şul uq isemdäge däwlät qömitetı itep üzgärtte. Elekke minister Räşit Sattarov isä wazifasınnan buşatıldı häm aña äle yaña urın täqdim itelmäde.

Şulay itep, Başqortstannıñ başqarma xakimitı strukturı tulısınça raslandı. Xäzer respublikada 15 ministerlıq häm 3 däwlät qömitetı bula. Ä witse – premierlar sanı, Räşit Sattarovnı alğannan soñ, bergä kimede. Elek Rafael Baydäwlätovnıñ 7 urınbasarı bulsa, xäzer alar altığa torıp qaldı. Yañadan raslanğan ministerlıqlar häm däwlät qömitetları 1 martqa qädär üzläreneñ struqtur üzgäreşläre xästärleklären tämamlarğa tieş, dip äytelä prezidentnıñ 29 ğinwarda imzalağan färmannarında.

XS
SM
MD
LG