Accessibility links

җомга, 9 декабрь 2016, Казан вакыты 22:32

Tatarstanda Qorban ğäyetenä äzerlänälär


Qazan kremlendä comğa könne Mintimer Şäymiev Qazannıñ fänni üzäk citäkçese, akademik Aleksandr Konovalovni qabul itte. Ul ğalimneñ 70 yıllığı uñayınnan häm anıñ ximiä fäne ölkäsendä zur uñışları öçen orden tapşırdı, respublikanı fänni ölkädä alğa alıp baruı öçen räxmätlären citkerde. Bötendönya tatar kongressı binasında da 30nçı ğinwar könne bik qızıqlı ber çara uzdı. Anda Tatar xalqınıñ üseş programmasın äzerläw buyınça fänni sovet cıyıldı. Älege komissiäneñ çirattağı utırışında anıñ citäkçese Damir İsxaqov häm Tatar kongressı wäkillärennän başqa Mirza Mäxmütov, Mirqasıym Ğosmanov, Mars Mixaylov kebek zur ğalimnär, akademiklar, yazuçı Şämsi Soltan, säyäsätçelär Marat Ğäliev, Midxät Färuqşin häm başqalar qatnaştılar. Bu qızıqlı häm ähämiätle fänni söyläşü xaqında tulıraq itep bez sezgä äle citkererbez. Tatarstanda bu könnärdä İslam dineneñ zur bäyrämenä – Qorban bäyrämenä äzerlänälär. Qazanda anı tatarlar ğına tügel, islam dinen totqan başqa millät xalıqları bilgeli. Mäsälän, respublikadağı äzerbäycan milli-mädäni moxtariäte 1 fevral könne ölkän buın keşeläre öçen bäyräm kiçäse uzdıraçaq. Berençelärdän bulıp Qorban ğäyete uñayınnan Tatarstan Diniä näzaräte räise Ğosman xäzrät İsxaqıynıñ qotlawları dönya kürde. Ul anda İslam dine – tınıçlıq dine. Şuña kürä bez keşelärne suğışlardan tıyılırğa, xaqsız qan qıyudan saqlanırğa çaqırabız. Keşelär qorban bulmasın, digän häm bäxet-säğädät, mullıq-bäräkät telägän. Comğa könne Mintimer Şäymiev tä respublika möselmannarın älege olı bäyräm belän qotladı.



Saylaw aldı yañalıqları. Belgänegezçä, Tatarstannıñ Üzäk saylaw komissiäse 14nçe martta bulaçaq respublika Däwlär Şurasına säyläwlarda qatnaşırğa teläwçelärdän ğarizalar alunı tämamladı. Xäzer saylaw komissiäsendä alğan ğarizalarnı, bulğan mäğlümätlärne tikşerü, nämzätlärne räsmi räweştä terkäw bara. 30nçı ğinwar könne komissiä äğzäläre üzläreneñ çirattağı utırışlarında 14nçe martta ütäçäk saylawlarda qatnaşu öçen 4 säyäsi firqäne rasladılar. Alar – Rusiäneñ Jizn’ firqäse, Berdäm Rusiä, LDPR häm SPS yäki Uñ köçlär firqäläre. Şulay itep, bügenge köndä ğarizaların tapşırğan 9 firqäneñ 5 inde Tatarstan Däwlät Şurası saylawlarına äzerlänä tora ala. Qalğannarınıñ yazmışı isä şuşı arada xäl iteläçäk.



Comğa, 30nçı ğinwar könne, Tatarstan Mäğärif ministrlığınıñ kollegiäse uzdı. Anıñ utırışında respublikada mäğärif ölkäsendäge 2003nçe yıldağı eşçänlekkä yomğaq yasaldı, älege yılğa plannarın bilgelände. Töp çığış belän utırışta Mäğärif ministrı Färis Xarisov qatnaştı. Äytergä kiräk, ministr häm anıñ ministrlığı öçen xäzer bik qatlawlı waqıt. Soñğı arada respublika mäktäplärendä tatar telen uqıtu kimetelgän dip, alardan añlatmalar alu, alarnı ğäyepläw kampaniäse bara. Xäyer, comğa könne bulğan cıyılışta süz bu xaqta barmadı. Kollegiädä Tatarstan xökümäte citäkçese Röstäm Miñnexanov, anıñ urınbasarı Zilä Wälieva qatnaştılar. Röstäm Miñnexanov üzeneñ çığışında, Mäğärif ministrlığına başqa ministrlıqları belän nığraq xezmättäşlek itärgä kiräk, digän teläk belderde.

Gölnaz İlgizär

XS
SM
MD
LG