Accessibility links

якшәмбе, 4 декабрь 2016, Казан вакыты 19:29

Matbuğatqa küzätü


Küzätüne bu yulı Mädäni comğa gäzitennän başlıybız. Anıñ bu sanı Räşit Ğärifneñ Bezdä xalıq xakimiäte barmı digän temağa uylanuları belän başlanıp kitä. Ğädättägeçä, atnalıq xäbärlär dä urın alğan monda. Şulay uq gäcitneñ 30nçı ğinwar sanında İ tuğan tel quşımtası da dönya kürgän. Bu çığarılışta uquçılarğa sügenü turında, yuğarı uqu yortların telneñ yazmışı, tatar isemnäre xaqında uylanular täqdim itelgän. Mädäni comğada dini temada iğtibarsız qalmağan. Qorban bäyräme uñayınnan anda Yosıf Tawaslınıñ wäğäze urın alğan. Ä xalqıbıznıñ mirası belän qızıqsınuçılarğa Damir Ğärifullinnıñ Ğäliäskär Kamal qayçan tuğan dip isemlängän yazması ayıruça qızıqlı bulır. Avtor fikerençä, tanılğan dramaturg bez belgänçä 1879nçı yılnıñ 25nçe dekaberendä tügel, ä şul uq yılnıñ 30nçı ğinwarında tuğan ikän. Watanım Tatarstan gäcite isä tatar milläteneñ yazmışına tä’sir yasarlıq ber ölkägä – tatar matbuğatı yazmışı xaqında uylana. Anıñ comğa sanında Bezgä nindi gäcit kiräk digän temağa citdi söyläşü urın alğan. Älege söyläşüdä ğalimnär Damir İsxaqov, İskändär Ğiläcev, Räfiq Möxämmätşin, Ramil Ğärifullin, jurnalist Tälğät Bariev, Raşat Safin qatnaşalar. Anı gäcitneñ baş möxärrire Miñnazıym Säfärov alıp bara. Annan tış Watanım Tatarstannıñ comğa sanında şiğriät belän qızıqsınuçılar Räbit Batullanıñ şağir Robert Äxmätcan turında uylanuların taba ala. Şulay uq anda Ğäliäskär Kamal teatrında küptän tügel genä uzğan premyera – “Yara” spektakle xaqında Asiä Yunısovanıñ fikerläre belän tanışırğa mömkin.



Gölnaz İlgizär

XS
SM
MD
LG