Accessibility links

җомга, 9 декабрь 2016, Казан вакыты 01:18

Tatarstannıñ bar mäçetlärendä Qorban ğäyete uqıldı


Respublikada xäzer mäçetlär sanı 1000 meñnän artıq, dip isäplänä. Tatarstannıñ «Yaña ğasır» televidenie kanalı, Qazannıñ Bolğar mäçetendä barğan bäyräm çaraların turı efirda tapşırdı. Ğäyetkä kilgän xalıq mäçetkä sıymadı, kübese wäğäzlärne uramda tıñlap tordı. Şul uq xäl, Qazannıñ barlıq mäçetlärendä diärlek qabatlandı. Bolğar mäçetendä, möselmannar aldında möfti Ğosman xäzrät İsxaqi çığış yasadı.

Möfti xötbäsendä Qorban bäyrämeneñ mäğnäsen añlattı, xäzerge zaman problemalarına tuqtalıp kitte. Bu yulı möfti säyäsi mäsälälärğä ällä ni qağılmağan ide. «Citäkçelärne sükmägez, sez alarnı üzegez saylağan», dip kenä äytte. Ul şulay uq, şuşı könnärdä Säğüd Ğäräbstanında xac qılğan möselman qärdäşlärne dä iskä aldı. Bıyıl Rusiädän Mäkkägä 5 meñläp möselman kitkän, alarnıñ 400gä yaqını Tatarstannan ikän. Möfti wäğäzen söyläp betergännän soñ, imamnar mäçet eçendä häm tışında cielğan möselmannarğa ğäyet namazın uqu tärtiben añlattı. Azan yañğıradı.

Ğäyettän soñ, qorban çalırğa röxsät itelde. Mäsälän, Märcäni mäçete yanında izge burıçnı ütärgä teläweçlär, sarıqlarğa qarağanda kübräk buldı. Şuña mäçet yanında çirat barlıqqa kilde. Ciñel maşinalar sarıqlarnı kiterep tordı, alar bik tiz arada satılıp bardı. Qorban malınıñ bäyäse – 2 meñ sum tiräse.

Qorban ğäyete belän Tatarstan möftie, Rusiä möftilär şurası räise, Rusiä häm Tatarstan prezidentları, xakimiät firqäse citäkçelege häm törle urınnarğa saylanırğa telägän nämzätlär qotladı.

Bikä Timerova, Qazan

XS
SM
MD
LG