Accessibility links

шимбә, 3 декабрь 2016, Казан вакыты 03:31

Ğiraqnıñ körd öleşendä 3 könlek matäm iğlan itelde


Ğiraqnıñ tönyağında Yarım aftonom Körd ölkäseneñ parlamentı kiçäge terror höcümnäre uñayınnan 3 kön matäm iğlan itte. Kiçä ike intixar terror höcüme näticäsendä kimendä 65 keşe hälak buldı, 250-dän artıq keşe yaralandı. Bombalar Arbil şähärendä xalıq qorban bäyräme uñayınnan cıyılğaç Kördstan Watandarlar Berlege häm Körd Demokratik Partiäläre idaräläre yanında şartladı. Bu höcüm näticäsendä Kördstan Watandarlar Berlege 3 yuğarı citäkçesen, Körd Demokratik Partiäse 4 yuğarı citäkçesen yuğalttı. Ğiraq tışqı eşlär ministrı, çığışı belän Körd Xöşiär Zebari bu höcüm öçen Ansar äl İslam suğışçan törkeme cawaplı dip belderde. Bügen Quşma Ştatlarda perzidentı George Bush AQŞ küzläw oyışmalarınıñ ğiraqtağı eşçänlegenä bäysez tikşerü ütkäreläçäk komissiä oyıştırılaçağın iğlan itte:

AUDİO: Min terrorğa qarşı suğışta üzebezneñ qayda buluıbıznı häm närsäne yaxşırta aluıbıznı öyränü öçen ike partiä wäkillärennän bäysez komissiä oyıştıram.

Elek Ğiraqta qoral tikşerüläre üktärgän törkem citäkçese David Kaynıñ uzğan atnada Ğiraqta küzläw mäğlümätlärendä äytelgän küpläp üterü qoralları bulmağan axırı dip belderüe bäysez tikşerü ütkärü taläbeneñ artuına säbäp buldı.

Britaniä parlamentınıñ tübän palatasındağı tışqı mönäsäbätlär komitetı AQŞ citäkçelegendäge koalitsiäneñ Ğiraqta küpläp üterü qoralları taba almawı Quşma Ştatlarnıñ häm Britaniäneñ terrorçılıqqa qarşı suğışına ışanıçnı kimetä dip belderde. Älege komitetnıñ yaña xisabında Ğiraq suğışı Britan hädäflärenä qarşı terror höcümnär kimetkän tügel ä arttırğan bula ala dielä. Xisapta şulay uq Britaniäneñ xärbi häm xärbi bulmağan xezmätläre Ğiraqta äle tağın berniçä yıl kiräk bulırğa mömkin dielä.

XS
SM
MD
LG