Accessibility links

чәршәмбе, 7 декабрь 2016, Казан вакыты 00:56

İlsöyär Xäyrullina: «Däwlät Şurası xakimiät parlamentına äylänä» Watanım Tatarstan


«Bäyräm möbaräk bulsın!» Tatarstan yäşläre gäziteneñ tışlığında şundıy yazunı kürep bula. Gäzit, Mäkkädäge xac qılu ğämäle häm qorban çalu, malnıñ bäyläre turında täfsille mäğlümat birä. Watanım Tatarstan häm Республика Татарстан gäzitlärendä dä, bäyräm ruxı çağılış taptı. Anda Qorban bäyräme belän räsmi qotlawlar basılıp çıqtı.



«Däwlät Sovetımı ällä direktorlar sovetımı?» digän baş astındağı mäqäläne Watanım Tatarstan gäzite bastırdı. Anıñ avtorı İlsöyär Xäyrullina «kem häm ni öçen Tatarstan parlamentında deputat bulırğa teli?» dip uylana. «Kemder, deputat qağılsızlığı öçen, kemder matdi xälen yaxşırtır öçen bara anda», dip yaza ul. Xatın-qzlar parlamentta yuq diärlek, yäşlärgä dä deputat bulu bik tätemi. Xakimiät firqäse isemennän deputatlıqqa töğäyınlängän keşelär arasında törle däräcädäge citäkçelärneñ küplege absurdqa citkän, dip bilgeläp ütä xäbärçe. 42 keşedän 4-se genä xäzerge parlamentta komissiä räisläre, qalğannarı – general`, başqarma direktorlar, räislelär häm alarnıñ urınbasarları. Menä mäqälädän ber özek:

«Sıyırlar su eçkändä, bozawlar boz yalıy digändäy, xakimiät firqäse yabırılıp parlamentqa kilgändä, başqa firqädägelär häm partiäsezlärneñ anda urın aluları, zakonçalıqlı küreneş tügel, ä çınbarlıqqa taşlama ğına bula ala. Bäs, şulay ikän. Bu inde, «Berdäm Rossiä» xakim partiä bulğan kebek, Däwlät Sovetı da xakimiät parlamentına äylänä digän süz

Bu Watanım Tatarstan gäzitendä çıqqan yazmadan ber özek ide. Şuşında uq, xakimiät firqäsennän deputatlıqqa täqdim itelä torğan nämzätlär turında mäğlümat tä basılğan. Qaysı nämzätneñ küpme aqçası, milke bar, barısın da Watanım Tatarstannan belä alasız.



Tatarstan yäşläre gäzite dä parlament temasına iğtibar kürsätä. Bu gäzitneñ şimbä sanında, aldağı atna axırında ütkän Däwlät Şurası sessiäsennän reportaj basıldı. Bu gäzitneñ parlament xäbärçese Riman Ğilemxanov, Konstitutsiägä üzgäreşlär kertü häm tellär turındağı qanun tiräsendäge bäxäslärne surätläp birä. Bu yazmadan, Deputat häm komissiä räise Razil Wälievnıñ şuşı tellär turındağı qanunnı eşläwgä küpme küç quyğanın belep bula. Saylawlar köne yaqınlaşu belän, nämzät Razil Wäliev turında kübräk işeterbez äle, dip farazlap bula. Bu süzebez döreskä çığarmı, yuqmı, Tatarstan yäşläre gäzitennän qarap belerbez.

Вечерняя Казань gäziteneñ şimbä çığarılışında berençe bitenä İlham Şakirov belän Salawat räsemnären bastırğan. İlham Şakirovnıñ bu könnärdä tuğan köne ikän. Gäzit xäbärçese bu uñaydan anıñ belän äñgämä ütkärgän. Mäqälädän añlaşılğança, İlham abıy, bik tıynaq keşe, çamadan tış iğtibarğa qıyınsına ikän. Şuña ul filarmoniäneñ anıñ tuğan könenä bağışlap konsert oyıştıruına bik şatlanmıy häm tamaşaçılarnıñ, yanına kilep, mäğnäsez sorawlar birüen önämi. «Sez tormıştan qänäğätme?», dip sorıy annan gäzit xäbärçese. İlham Şakirov :«Yuq, ägär keşe böten närsä belän qänäğät ikän, dimäk aña inde tege dönyağa da kitärgä bula» dip cawap birä. Bu yazma Вечерняя Казань gäzitendä basılıp çıqtı.

Bikä Timerova.

XS
SM
MD
LG